इटहरी/ नेपाली फिल्म क्षेत्रमा स्टारडम अर्थात् चलेका अनुहार मात्र बिक्छ भन्ने भाष्यलाई सोमबार साँझ ललितपुरको लविम मलमा आयोजित एक प्रिमियरले गलत साबित गरिदिएको छ । सस्पेन्स थ्रिलर जनरामा बनेको फिल्म ‘अभिमन्यु : च्याप्टर–१’ को प्रिमियर शो सकिँदा हलमा उपस्थित फिल्मकर्मी र सञ्चारकर्मीको मुखमा एउटै बोली थियो– “फिल्ममा स्टार होइन, कलाकार र कथाको जित भएको छ ।”
यही बिहीबारबाट प्रदर्शनको तयारीमा रहेको सेभेन सिज सिनेमाको प्रस्तुति ‘अभिमन्यु : च्याप्टर–१’ ले प्रिमियरमा उत्कृष्ट प्रतिक्रिया बटुलेको छ । प्रिमियरपछि बोल्दै अभिनेता दिव्यदेव पन्तले फिल्मको मेकिङ र कास्टिङको खुलेर तारिफ गरे । उनले निर्माता विनोद पौडेलले ‘पूर्णबहादुरको सारङ्गी’ मा जस्तै यसमा पनि बजारका ‘स्टार’ को पछि नलागी ओझेलमा परेका तर अब्बल कलाकारहरूलाई (अन्डररेटेड) विश्वास गरेको बताए ।
“विनोद दाइले स्टार खोज्नुको साटो राम्रो कलाकार र बलियो कथामा लगानी गर्नुभएको छ, जसको प्रतिफल पर्दामा देखिन्छ,” दिव्यदेवले भने । साथै, उनले नेपाली फिल्ममा महिला पात्रलाई प्रस्तुत गर्ने परम्परागत शैलीलाई यो फिल्मले तोडेको भन्दै कथावस्तुको प्रशंसा गरे । यस्तै धारणा निर्देशक सोभित बस्नेतको पनि थियो । “पहिला स्टारका फिल्म चल्थे, अहिले कलाकारका फिल्म चल्न थालेका छन्,” बस्नेतले भने, “अभिमन्युमा कामेश्वरजस्तो अत्यन्त राम्रो कलाकार हुनुहुन्छ । दर्शकले अब अनुहारभन्दा प्रतिभा रोज्न थालिसके ।”
फिल्मको सबैभन्दा बलियो पक्ष यसको सस्पेन्स र थ्रिलर भएको प्रतिक्रिया धेरैले दिएका छन् । मोडल तथा अभिनेत्री एलिशा बास्तोलाले फिल्म हेर्दा आफूलाई ‘ब्लकबस्टर’ हुने महसुस भएको बताइन् । उनले भनिन्, “हामीले साउथ इन्डियन फिल्म जसरी कौतुहलताका साथ हेर्छौं, यो फिल्मले पनि ‘अब के हुन्छ ?’ भन्दै अन्तिमसम्म त्यसरी नै बाँधेर राख्छ ।”
@parikalanewsofficial
अर्की अभिनेत्री रुषा न्यौपानेले नेपालमा चलिरहेको ‘फ्यामिली ड्रामा’ को ट्रेन्डभन्दा फरक स्वाद यो फिल्मले दिने बताइन् । हास्य कलाकार भरतमणी पौडेलले फिल्मले दाइजो प्रथाजस्तो गम्भीर विषयलाई सस्पेन्सको माध्यमबाट सशक्त ढंगले उठाएको प्रतिक्रिया दिए । लामो समयको संघर्षपछि मुख्य भूमिकामा देखिएका अभिनेता कामेश्वर चौरसिया प्रिमियरमा निकै भावुक देखिए । आफ्नो अभिनय यात्रालाई सम्झिँदै उनले भने, “कलाकार बन्न त सकिँदो रहेछ, तर लिड क्यारेक्टरको लागि एउटा बलियो लिखित दस्तावेज (स्क्रिप्ट) नै चाहिँदो रहेछ । मैले अहिलेसम्म जे गरेँ, यहाँ आइपुग्नकै लागि रहेछ ।”
फिल्मकी अभिनेत्री लक्ष्मी बर्देवाले सुटिङका क्रममा आफू गर्भवती रहेको खुलासा गरिन् । शारीरिक अवस्था जटिल हुँदाहुँदै पनि फिल्मको स्क्रिप्ट र टिममाथिको विश्वासले काम गरेको उनले बताइन् । “सुरुमा स्क्रिप्ट पढ्दाभन्दा पर्दामा फिल्म हेर्दा अझ राम्रो बनेको पाएँ,” उनले भनिन् । अभिनेत्री सरिता गिरीले पुरुष प्रधान उद्योगमा महिला केन्द्रित कथा आउनु र त्यसमा पुरुष पात्रहरूले साथ दिनु सुखद पक्ष भएको बताइन् ।
सुशान्त गौतमको निर्देशन र मुकेश खनालको लेखन रहेको यो फिल्ममा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल, शिशिर वाङ्देल लगायतको मुख्य भूमिका छ । विनोद पौडेल र गुञ्जन गिरी निर्माता रहेको फिल्ममा मनोज श्रेष्ठको भिएफएक्स र शरद महतोको छायांकन छ । नेपाली र हिन्दी दुवै भाषामा तयार भएको ‘अभिमन्यु : च्याप्टर–१’ नेपालका साथै विश्वभर एकसाथ रिलिज हुँदैछ ।
Discussion about this post