फिल्म ‘कुमारी’को रिलिज मितिसँगै चर्चित गीत ‘कता छौ मेरो फूल’ सार्वजनिक

इटहरी/ ‘नोभेम्बर रेन’ र ‘क्लासिक’ जस्ता सफल प्रेमकथा पस्किएर दर्शकको मन जितेका निर्देशक दिनेश राउत पुनः आफ्नो ‘सिग्नेचर जनरा’ अर्थात् लभ स्टोरीमा फर्किएका छन् । पछिल्लो समय सामाजिक कथावस्तुमा केन्द्रित रहेका राउतले निर्देशन गरेको नयाँ फिल्म ‘कुमारी’को प्रदर्शन मिति घोषणा गरिएको छ । निर्माण पक्षले भ्यालेन्टाइन डे (प्रणय दिवस) को छेको पारेर आगामी माघ २३ गते लाई फिल्मको प्रदर्शन मिति तय गरेको हो ।

प्रदर्शन मितिको घोषणासँगै फिल्मको पहिलो आधिकारिक गीत ‘कता छौ मेरो फूल’ पनि सार्वजनिक गरिएको छ । यो गीत सार्वजनिक हुनुअघि नै चर्चामा थियो । केही समयअघि टुँडिखेलमा आयोजित एक कार्यक्रममा गायक केहर सिंह लिम्बु र उनको ब्यान्ड ‘केहर एन्ड द लुङ्गा’ले लाइभ प्रस्तुति दिँदा यो गीतले ठुलो हाइप बटुलेको थियो । विशेष गरी टिकटक र युट्युबमा ‘जेन-जी’ पुस्ताबिच लोकप्रिय बनेको यो गीतलाई अब आधिकारिक भिडियोसहित रिलिज गरिएको छ । हेर्नुस् भिडियो ।

फिल्ममा जम्मा ४ वटा गीत रहने छन्, जसमा केहर सिंहकै स्वर सुन्न सकिनेछ । यो फिल्म ‘कुमारी’ मार्फत नेपाली फिल्म क्षेत्रमा नयाँ जोडीको उदय हुँदैछ । मुख्य भूमिकामा अबिषेक खड्का र आकृति राजभण्डारीले यसै फिल्मबाट डेब्यु गर्दैछन् । उनीहरूका अलावा घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने, मनीषा शर्मा लगायतका कलाकारहरूको अभिनय फिल्ममा रहनेछ ।

@parikalanewsofficial

निर्देशक राउतका अनुसार ‘पुजार सार्की’ भन्दा अघि नै यसको काम सुरु भए पनि विविध कारणले अहिले दर्शकमाझ आउन लागेको हो । विकास सुवेदीको पटकथा रहेको यस फिल्मलाई महेन्द्र अधिकारीले निर्माण गरेका हुन् भने केदार भुसाल कार्यकारी निर्माता हुन् । विनिश इन्टरटेन्मेन्ट र पिक्चर फ्रेमको ब्यानरमा बनेको फिल्मको प्राविधिक पक्ष पनि बलियो देखिन्छ ।

छायाङ्कनमा सुसन प्रजापति, सम्पादन/रङ्ग संयोजनमा सुप्रिम पराजुली, साउन्ड डिजाइनमा उत्तम न्यौपाने रहेका छन् । यस्तै फिल्मको कोरियोग्राफी किरण थापा र शिशिर खातीले गरेका हुन् भने प्रोडक्सन डिजाइनर आशिका शर्मा रहेका छन् । फिल्मको डिजिटल अधिकार केन्द्र मोशन पिक्चर्सले लिएको छ भने हल वितरणको जिम्मा काठमाडौँमा डीसीएन र उपत्यका बाहिर कुवेर सिने डिस्ट्रीब्युशनले पाएका छन् ।