विद्यार्थीको मनोविज्ञान र ‘फर्स्ट’ हुनैपर्ने दबाबमाथि ‘रोल नंं. १’, सुरुभयो छायांकन

इटहरी/ कक्षाकोठामा ‘फर्स्ट’ हुनैपर्ने दबाब र यसले विद्यार्थीमा पार्ने गहिरो मनोवैज्ञानिक असरको कथा बोकेको फिल्म ‘रोल नंं. १’ को छायांकन औपचारिक रूपमा सुरु भएको छ । दुई साता लामो सघन कार्यशाला पश्चात निर्माण टिम छायांकनका लागि म्याग्दी पुगेको हो । यो फिल्म केवल मनोरञ्जन मात्र नभई एउटा गम्भीर सामाजिक मुद्दामा आधारित रहेको छ ।

निर्माता विनोद पौडेलका अनुसार, फिल्मले समाजमा व्याप्त ‘भ्रम र कथित सामाजिक प्रतिष्ठा’ को पर्दा उघार्ने प्रयास गर्नेछ । विशेषगरी, “कक्षामा जो प्रथम (फर्स्ट) हुन्छ उही विद्वान हो र अरू सबै मुर्ख हुन्” भन्ने परम्परागत भाष्यले विद्यार्थीहरूमा सिर्जना गर्ने मानसिक तनावलाई फिल्मले सुक्ष्म ढंगले प्रस्तुत गर्नेछ ।

केही समयअघि सार्वजनिक गरिएको फिल्मको फस्टलुक पोस्टरमा पनि यही मनोविज्ञान झल्कने गरी कक्षाकोठामा हात उठाइरहेको एक बालक र निलो सर्ट लगाएका विद्यार्थीहरूको भीड देखाइएको थियो । जोन योञ्जनको लेखन तथा निर्देशन रहेको यस फिल्ममा सशक्त कलाकारहरूको अभिनय देख्न पाइनेछ । फिल्मको मुख्य भूमिकामा मुकुन भुसाल, सुशांक मैनाली, रेणु योगी, सिर्जना अधिकारी, शुन्दर धिताल, निर्भिक रेग्मी लगायत कलाकारको रहेका छन् ।

@parikalanewsofficial

सेभेन सिज सिनेमाको ब्यानरमा निर्माण भइरहेको यस फिल्मको छायांकन तालिका करिब डेढ महिनाको रहेको छ । फिल्मको प्राविधिक र निर्माण पक्ष पनि बलियो बनाइएको छ । विनोद पौडेल र गुञ्जन गिरी निर्माता रहेको फिल्मको कार्यकारी निर्माता रमेश चौलागाईं हुन् । यस्तै पटकथा/संवाद महेश दवाडी, छायांकन शिवराम श्रेष्ठ, संगीत प्रशान्त शिवाकोटी र सम्पादन मदन घिमिरेको रहनेछ ।

यसबाहेक फिल्मको चिफ एडीमा फिरोड खड्का, प्रोडक्सन डिजाइनरमा कला संग्रौला र प्रोडक्सन हेडमा मनोज जोशी रहेका छन् । यही फिल्मको छायांकन सुरु हुँदै गर्दा, निर्माता विनोद पौडेलको निर्माण रहेको अर्को प्रतिक्षित फिल्म ‘अभिमन्यु : च्याप्टर–१’ भने प्रदर्शनको तयारीमा छ । उक्त फिल्म यही मंसिर १८ गतेबाट देश तथा विदेशमा एकसाथ दर्शकमाझ प्रदर्शनमा आउँदैछ ।