‘पूर्ण बहादुरको सारङ्गी’को रेकर्ड ब्रेकपछि निर्माताको अर्को परिक्षा, ‘अभिमन्यु’ किन हेर्ने ?

इटहरी/ नेपाली बक्स अफिसमा ऐतिहासिक रेकर्ड कायम गरेको फिल्म ‘पूर्ण बहादुरको सारङ्गी’ को ह्याङओभर नसकिँदै सोही निर्माताको लगानी रहेको अर्को बहुप्रतिक्षित फिल्म ‘अभिमन्यु : च्याप्टर–१’ दर्शकमाझ आउन अब धेरै समय छैन । लामो समयदेखिको पखाईलाई चिर्दै यही मंसिर १८ गते (बिहीबार) देखि यो फिल्म नेपालभर एकसाथ प्रदर्शनमा आउँदै छ । केही हलहरुले यो फिल्मको बुकिङ खुलाइसकेको छ ।

विशेष कुरा त के छ भने, यो फिल्म नेपाली र हिन्दी दुवै भाषामा एकसाथ रिलिज हुँदैछ । सेभेन सिज सिनेमाको ब्यानरमा निर्माण भएको र सुशान्त गौतमले निर्देशन गरेको यस फिल्मले रिलिज अगावै दर्शकमा कौतुहलता जगाएको छ । अहिलेको समयमा दर्शकको रोजाइमा किन ‘अभिमन्यु’ पर्न सक्छ ? यसका ५ बलिया आधारहरू यस्ता छन् :

१. कामेश्वर चौरसियाको ‘डेब्यु’ लिड :
नेपाली फिल्म क्षेत्रमा दुई दशक बिताइसकेका अभिनेता कामेश्वर चौरसियालाई दर्शकले प्रायः सहायक वा क्यारेक्टर आर्टिस्टको रूपमा मात्र देखेका छन् । ‘अभिमन्यु’ मार्फत उनले पहिलो पटक ‘सोलो लिड’ (मुख्य अभिनेता) को जिम्मेवारी पाएका छन् । २० वर्षको अनुभव र संघर्षपछि काँधमा आएको यो जिम्मेवारीलाई न्याय गर्न उनले कडा मेहनत गरेका छन्, जुन उनका लागि आफूलाई प्रमाणित गर्ने सुनौलो अवसर हो ।

२. लक्ष्मी बर्देवाको अग्निपरीक्षा :
अभिनेत्री लक्ष्मी बर्देवाका लागि पनि यो फिल्म विशेष छ । यसअघि उनले मुख्य भूमिका निर्वाह गरेका चारवटा फिल्म निर्माण भएर पनि रिलिज हुन सकेका थिएनन् । प्रदर्शनको हिसाबले ‘सोलो लिड’ मा आउन लागेको यो उनको पहिलो फिल्म हो । त्यसैले लक्ष्मीलाई मुख्य भूमिकामा पर्दामा हेर्ने दर्शकको चाहना यसपटक पूरा हुनेछ ।

@parikalanewsofficial

३. निर्माताको ट्र्याक रेकर्ड :
यो फिल्म तिनै निर्माताले बनाएका हुन्, जसले ‘पूर्ण बहादुरको सारङ्गी’ मार्फत नेपालमा मात्रै करिब ४७ करोडको ऐतिहासिक ग्रस कलेक्सनको रेकर्ड बनाए । बक्स अफिसमा जादु चलाउन माहिर मानिएको यो टिमको अर्को प्रोजेक्ट कस्तो होला भन्ने उत्सुकता आम दर्शकमा छ । सफल ब्यानरको दोस्रो प्रस्तुति भएकाले पनि दर्शकको विश्वास यसमाथि टिकेको छ ।

४. फरक कास्टिङ र निर्माताको ‘रिस्क’ :
निर्माता विनोद पौडेलले ‘पूर्ण बहादुरको सारङ्गी’ मा जस्तै यसमा पनि ‘स्टारडम’ भन्दा ‘कलाकारिता’ लाई विश्वास गरेका छन् । अरूले लिड रोलमा आँट नगरेका कलाकारलाई लिएर उनले फेरि अर्को जोखिम मोलेका छन् । पहिलो फिल्ममा उनको यो फर्मुला सफल भइसकेकोले, ‘अभिमन्यु’ मा उनले देखेको सबल पक्ष के हो ? त्यो थाहा पाउन पनि हलसम्म जानुपर्ने हुन्छ ।

५. तराईको कथा र परिवेश :
फिल्मले मधेसी मूलका मुख्य पात्र र भोजपुरी फ्लेबरको गीत–संगीत समेटेको छ । यसले तराई–मधेसको कथा वाचन गर्ने संकेत गरेको छ । मधेसको सेटिङमा कस्तो कथा बुनिएको छ भन्ने कुराले पनि फिल्मलाई हेर्न लायक बनाएको छ ।

मुकेश खनालको लेखन र मदन थापाको क्रिएटिभ निर्देशन रहेको फिल्ममा कामेश्वर र लक्ष्मीका अलावा सरिता गिरी, किरण श्रेष्ठ, गौमाया गुरुङ, प्रकाश दाहाल, शिशिर वाङ्देल लगायतका कलाकारको मुख्य भूमिका छ । फिल्मका निर्माता विनोद पौडेल र गुञ्जन गिरी हुन् भने कार्यकारी निर्मातामा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ रहेका छन् ।

रमेश चौलागाईं र हरि श्रेष्ठ सह–निर्माता रहेको यस फिल्मको लाइन प्रोड्युसर जीवन शाक्य हुन् । प्राविधिक पक्षमा शरद महतोको छायांकन, मनोज श्रेष्ठको भिएफएक्स, जुनिम गहतराजको कलर ग्रेडिङ र मदन घिमिरेको सम्पादन रहेको छ । यो फिल्म नेपालसँगै भारत र विश्व बजारमा पनि एकसाथ प्रदर्शन हुनेछ ।