गणेश उप्रेतीको कमब्याक फिल्म ‘झरीपछिको इन्द्रिणी’को पोस्टर सार्वजनिक

ईटहरी/ चर्चित हास्य कलाकार अर्जुन घिमिरे (पाँडे) अब अभिनयबाट निर्देशनको कमान्ड सम्हाल्ने भूमिकामा आइपुगेका छन् । उनको डेव्यु निर्देशन रहेको प्रतिक्षित फिल्म ‘झरीपछिको इन्द्रिणी’ को आधिकारिक पोस्टर आइतबार सार्वजनिक गरिएको छ । सार्वजनिक पोस्टरमा फिल्मको कथा बोल्नेगरी सवैजसो मुख्य पात्रहरूलाई उनीहरूको ‘क्यारेक्टर लुक्स’ मा स्थान दिइएको छ ।

नागराज इन्टरटेन्मेन्ट प्रालिको ब्यानरमा निर्माण भएको यस फिल्मको अर्को मुख्य आकर्षण अभिनेता गणेश उप्रेतीको पुनरागमन हो । लामो समयदेखि पर्दा बाहिर रहेका उप्रेतीले यसै फिल्ममार्फत कमब्याक गरेका छन् । उनी विशेष गरी यस फिल्मको छायांकनकै लागि अमेरिकाबाट नेपाल फर्किएका थिए ।

फिल्ममा अनुभवी र नयाँ कलाकारहरूको बाक्लो उपस्थिति रहेको छ । पोस्टरमा गणेश उप्रेतीका साथै रमेश उप्रेती, प्रकाश घिमिरे, दीपाश्री निरौला, सरिता गिरी, देशभक्त खनाल, निर्मल शर्मा, कृष्ण शिवाकोटी, कृष्णभक्त महर्जन र स्वयं निर्देशक अर्जुन घिमिरे (पाँडे) लाई देख्न सकिन्छ ।

यसैगरी, लोकप्रिय कलाकारहरू प्रियना आचार्य (मुन्नी), अंशु महर्जन, राजेन्द्र नेपाली र लक्षणा राईको पनि अभिनय रहेको छ । फिल्मबाट विमोचन दवाडी र जेसिका पोखरेलले नेपाली फिल्म क्षेत्रमा डेब्यु गर्दैछन् भने बाल कलाकारका रूपमा दिप्सन चिलवाल देखिएका छन् । फिल्मको कथालाई रोचक बनाउन एक विशेष गीत समावेश गरिएको छ, जसमा चर्चित मोडल अञ्जली अधिकारी र कोरियोग्राफर प्रदीप लामा विशेष भूमिकामा देखिने निर्माण पक्षले जनाएको छ ।

@parikalanewsofficial

निर्देशक घिमिरे स्वयंको कथा रहेको यस फिल्मको पटकथा तथा संवाद गणेश कार्की र विशाल घिमिरेले संयुक्त रूपमा लेखेका हुन् । बुद्ध थापाले छायांकन गरेको यस फिल्मको निर्मात्री अनिशा सेन्दाङ लिम्बु हुन् । फिल्मको सह-निर्माताहरूमा अनु थापा, पंकज खड्का, सिर्जना खड्का, सुवास शर्मा र राम कार्की रहेका छन् भने लाइन प्रोड्युसरको जिम्मेवारी योगेश खतिवडा र विनोद कँडेलले सम्हालेका छन् ।