जेन्जी आन्दोलनको कथा बोल्ने फिल्म ‘बिगुल’को फस्टलुक सार्वजनिक

इटहरी/ पछिल्लो समय देशमा जेनजी पुस्ताले सडकमा ओर्लिएर जुन परिवर्तनको आवाज उठाए, ठीक त्यही विषयवस्तुमा निर्माण भएको फिल्म ‘बिगुल’ प्रदर्शनका लागि तयार भएको छ । आइतबार फिल्मको ३ फस्टलुक पोस्टर सार्वजनिक गर्दै प्रदर्शन मिति माघ ९ गते तय गरिएको हो । यो फिल्मको निर्माण र कथा लेखनको संयोग निकै रोचक छ ।

निर्माण पक्षका अनुसार, गत भदौमा जेन्जीले देशव्यापी रूपमा उठाएका सुशासन र परिवर्तनका मुद्दाहरूमा केन्द्रित रहेर यो फिल्मको छायांकन त्यो आन्दोलनभन्दा ४ महिना अगाडि नै गत जेठमा सुरु भइसकेको थियो । कथाकार तथा निर्माता दिनेश कोइरालाले यसलाई अचम्मको संयोग मानेका छन् । उनी भन्छन्, ‘‘हामीले फिल्ममा उठाएको मूल मुद्दा र पछि सडकमा जेन्जी पुस्ताले उठाएका माग ठ्याक्कै मिल्न गएको छ । त्यसैले यो फिल्म हामीले जेन्जी आन्दोलनप्रति समर्पित गरेका छौं ।’’

फिल्मले भ्रष्टाचार र विकृति उन्मुलनका लागि युवा र महिलामा चेतनाको बिगुल फुकेको दाबी निर्माण पक्षको छ ।सार्वजनिक तीन डिजाइनका पोस्टरले फिल्मको गम्भीरतालाई प्रस्ट्याउँछन् । पहिलो पोस्टरमा अभिनेत्री बेनिशा हमाल गम्भीर भावमा देखिएकी छिन् भने पृष्ठभूमिमा राँको लिएका प्रदर्शनकारीहरूको हुल देखिन्छ । यस्तै दोस्रो पोस्टरमा बेनिशासहित अभिनेता नरेन खड्का र रमेश बुढाथोकी आक्रोशित मुद्रामा प्रस्तुत भएका छन् ।

सार्वजनीक तेस्रो पोस्टरमा भने फिल्मका अन्य प्रमुख कलाकारहरूलाई समेटिएको छ । फिल्मका निर्देशक रमेश कोइरालाले ‘बिगुल’ लाई भुइँमान्छेहरूको सपना, संघर्ष र बलिदानीको इतिहासको रूपमा व्याख्या गरेका छन् । उनले भने, ‘‘यसले मनोरञ्जनका साथै सामाजिक न्याय र महिलाले गर्नुपरेको संघर्षको पारिवारिक कथा पनि बोल्छ ।’’

@parikalanewsofficial

म्याग्नोलिया ग्रुपको ब्यानरमा, कल्पना पौडेलको प्रस्तुति रहेको यस फिल्ममा नेपाली फिल्म क्षेत्रका दिग्गज कलाकारहरूको अभिनय देख्न पाइन्छ । फिल्ममा बेनिशा हमाल र नरेन खड्काका अलवा नीर शाह, सरोज खनाल, रमेश बुढाथोकी, हेमन्त बुढाथोकी, शिशिर वाङ्देल, विनोद न्यौपाने, जेएन घिमिरे, गीता अधिकारी लगायतको अभिनय रहेको छ ।

प्रदिप भारद्वाज र मौनता श्रेष्ठको लेखन रहेको फिल्ममा विश्वप्रकाश शर्मा, अर्जुन पोखरेल र मनोज चौलागाईं संगीत समावेस छ । फिल्ममा समावेश गीतहरू विश्वप्रकाश शर्माले लेखेका हुन् । शिव ढकालको छायांकन, कमल राई र कविराज गहतराजको नृत्य, एनवी महर्जनको द्वन्द र तारा थापा ‘किम्भे’को सम्पादन यो फिल्ममा रहेको छ । सूर्य कान्त कोइराला र महेश कोइराला सह-निर्माता रहेको यो फिल्मलाई काठमाण्डौमा काफिया फिल्म्स् र काठमाण्डौ बाहिर श्री ब्याङ्केट्स इन्टरटेन्मेन्टले वितरण गर्ने जिम्मा लिएका छन् ।