मग्न नसामा सागर लम्साल बले, ‘डल्लेले इन्ट्री मार्यो’को फर्स्ट लुकमा फरक अवतार

इटहरी/ दर्शकमाझ लोकप्रिय अभिनेता सागर लम्साल ‘बले’ को मुख्य भूमिका रहेको फिल्म ‘डल्लेले इन्ट्री मार्यो’ को अफिसियल फर्स्ट लुक पोस्टर सार्वजनिक भएको छ । निर्माण पक्षले फिल्मको प्रदर्शन मिति घोषणा गर्दै सोमबार यो पोस्टर बाहिर ल्याएको हो । आगामी चैत २७ गते देखि देशभर प्रदर्शनमा आउने यस फिल्मले आफ्नो प्रचार प्रसारलाई पोस्टर रिलिजसँगै तीव्रता दिएको छ ।

सार्वजनिक पोस्टरमा अभिनेता सागर लम्साललाई मात्र स्थान दिइएको छ । पोस्टरमा उनी निकै फरक र गम्भीर लुक्समा देखिएका छन् । हातमा चुरोट च्यापेका र आँखामा नसा चढ्दा वा निदाएजस्तो देखिने उनको भावभंगीले पात्रको गहिराइलाई झल्काउँछ । यो लुक्समार्फत निर्देशकले वर्तमान युवा पुस्तामा बढ्दो कुलत र त्यसले निम्त्याउने अवस्थाप्रति सांकेतिक व्यंग्य वा सन्देश दिन खोजेको अनुमान गर्न सकिन्छ ।

पोस्टरमा अन्य कलाकारलाई भने समेटिएको छैन । राजु गिरीको निर्देशनमा बनेको यस फिल्मको छायांकन मुख्यतया कास्कीको रमणीय गाउँ याङ्जाकोटमा गरिएको छ । करिब ९० प्रतिशत दृश्य त्यहीँ खिचिएका छन् भने बाँकी १० प्रतिशत दृश्य काठमाडौंको गागलफेदी आसपासमा छायांकन गरिएको निर्माण पक्षले जनाएको छ ।

@parikalanewsofficial

फिल्मको पटकथा तथा संवाद लक्ष्मण सुवेदीले लेखेका हुन्, जसले यसअघि आधा दर्जनभन्दा बढी फिल्ममा लेखन र निर्देशनको अनुभव बटुलिसकेका छन् । उषा फिल्म्स प्रालिको ब्यानरमा निर्माण भएको यो फिल्ममा सागर लम्सालका साथमा कलाकारहरूको लामो लस्कर छ । सागर लम्साल (बले) संगै रोशनी खड्का, रमेश बुढाथोकी, हेमन्त बुढाथोकी, रबिन्द्र झा, कैलास रावत, विशाल पहाडी, ध्रुव कोइराला, साबित्रा चिलुवाल, आशा पौडेल, लक्ष्मीनाथ तिमिल्सिना, ओसिन भट्टराई लगायतको अभिनय रहेको छ ।

फिल्ममा स्वयं निर्देशक राजु गिरीको विशेष उपस्थिति रहेको छ भने बाल कलाकारमा कंगना गिरी, रोनिश खड्का र काजल गिरी रहेका छन् । फिल्मको निर्मातामा सावित्री चिलुवाल, आशिक बस्नेत, आदर्श बस्नेत, निर्मला बस्नेत र सरिता पुरी गिरी रहेका छन् । श्याम तामाङले छायाङकन गरेको फिल्ममा मुख्य सहायक निर्देशकको रुपमा विनयराज पौडेल छन् । फिल्मको कथा उमेश कुमार बस्नेतले लेखेका हुन् । यसलाई नेसनल सिने ग्रुपले वितरणको जिम्मा लिएको छ ।