धिरज, विनय र आन्नाको साथमा समिरको इन्ट्री, ‘रमिताको पिरति’को टिजर रिलिज

ईटहरी/ आगामी ‘भ्यालेन्टाइन डे’ लाई लक्षित गर्दै नेपाली फिल्म ‘रमिताको पिरति’ को आधिकारिक टिजर सार्वजनिक भएको छ । बुढा सुब्बा डिजिटलको युट्युब च्यानल मार्फत सार्वजनिक टिजरले एक युवतीको प्रेम, मनोविज्ञान र सङ्घर्षको गहिरो कथा बोल्ने संकेत गरेको छ ।

युवा पुस्तामाझ अत्यधिक लोकप्रिय गायक समिर श्रेष्ठले यसै फिल्म मार्फत नेपाली फिल्म क्षेत्रमा आफ्नो अभिनय यात्रा सुरु गरेका छन् । टिजरमा उनलाई प्रमुख भूमिकामा देख्न सकिन्छ, जसले उनका प्रशंसकहरूमाझ उत्साह थपेको छ । फिल्ममा समिरका साथै आन्ना शर्मा, धिरज मगर र विनय श्रेष्ठको पनि मुख्य भूमिका रहेको छ । हेर्नुस् टिजर ।

सार्वजनिक टिजरमा अभिनेत्री अन्ना शर्मालाई केन्द्रविन्दुमा राखिएको छ । प्रेमको सुरुवाती रोमाञ्च र खुसीदेखि हृदयविदारक पीडासम्मका विभिन्न भावनात्मक अवस्थाहरूमा उनलाई प्रस्तुत गरिएको छ । टिजर हेर्दा फिल्मले केवल सतही प्रेमकथा नभई एक युवतीको मनोविज्ञान र भित्री संवेदनालाई सूक्ष्म रूपमा चित्रण गरेको बुझ्न सकिन्छ ।

@parikalanewsofficial

यो फिल्मको अर्को सबल पक्ष भनेको यसको ‘फिमेल पर्स्पेक्टिभ’ हो । फिल्मको लेखन तथा निर्देशन सुदीप्ताले गरेकी हुन् । एक महिला पात्रको कथालाई महिला निर्देशकले नै पर्दामा उतारेका कारण फिल्ममा भावनात्मक गहिराई विशेष हुने अपेक्षा गरिएको छ । सेरो फिल्मस्को प्रस्तुति रहेको यस फिल्मका निर्माता सागर लम्साल हुन् । आगामी माघ २३ गते प्रदर्शन हुने पक्का भएको यो फिल्मलाई एप्पल इन्टरटेन्मेन्ट, रिच इन्टरटेन्मेन्ट र एफडी कम्पनीले वितरण गर्नेछन् ।