फस्टलुकमा काजी: विपिन र केकीको प्रेम कथा बोल्ने ‘काजी’ चैत २७ मा

इटहरी/ अभिनेता विपिन कार्की र अभिनेत्री केकी अधिकारीको मुख्य भूमिका रहेको फिल्म‘काजी’ को प्रदर्शन मिति तय गरिएको छ । निर्माण पक्षले बिहीबार फिल्मको फस्ट लुक पोस्टर सार्वजनिक गर्दै आगामी नयाँ वर्ष २०८३ को छेको पारेर चैत २७ गते लाई रिलिज मिति घोषणा गरेको हो । सार्वजनिक पोस्टरमा अभिनेता विपिन कार्कीलाई निकै फरक र आकर्षक गेटअपमा प्रस्तुत गरिएको छ ।

सफा दारी र चिटिक्क परेको कपालमा सजिएका विपिन ‘योङ एण्ड ह्यान्डसम’ देखिएका छन् । गम्भीर मुद्रामा रहेका उनी केही सोचिरहेको भावमा देखिन्छन् । पोस्टरको अर्को आकर्षण अभिनेत्री केकी अधिकारी हुन् । विपिनले केकीलाई आफ्नो मुटुमा सजाएर राखेको जस्तो देखाइएको पोस्टरले दर्शकमा कौतुहलता जगाउछ । पोस्टरमा उनीहरूले सँगै खाना खाइरहेको विगतको सुखद् पललाई पनि सांकेतिक रूपमा देखाइएको छ, जसले फिल्म पूर्ण रूपमा पारिवारिक लभस्टोरीमा आधारित रहेको संकेत गर्छ ।

यो फिल्ममार्फत निर्देशक लक्ष्मण रिजालले ८ वर्षपछि निर्देशनमा ‘कमब्याक’ गरेका छन् । यसअघि ‘कसम’, ‘धुँवा यो नसा’, ‘अलविदा’ र ‘कायरा’ जस्ता फिल्म निर्देशन गरिसकेका रिजालले आफूले खोजेको जस्तै बलियो स्क्रिप्ट पाएकाले ‘काजी’ मार्फत फर्किएको बताएका छन् । रिजाल एण्ड रिजाल प्रोडक्सनको ब्यानरमा निर्माण भएको यो फिल्मका प्रस्तुतकर्ता रामप्रसाद रिजाल हुन् ।

@parikalanewsofficial

फिल्ममा विपिन र केकीका अलावा गरिमा शर्मा, प्रकाश घिमिरे, हेमन्त बुढाथोकी, विशाल पहारी, विनोद न्यौपाने, रश्मी भट्ट, हिउँवाला गौतम लगायतका कलाकारहरूको अभिनय रहेको छ । प्रदीप भारद्वाजको लेखन रहेको फिल्मलाई चिन्तन राजभण्डारीले छायांकन गरेका हुन् भने संगीत कालीप्रसाद बास्कोटाको रहेको छ । यस्तै, नृत्य निर्देशन कविराज गहतराज र ब्याकग्राउन्ड स्कोर सुजिल कर्माचार्यको रहेको छ । नयाँ वर्षको बिदालाई लक्षित गर्दै प्रदर्शनमा आउन लागेको ‘काजी’ लाई श्रीराम बालाजी फिल्म्सले वितरण गर्नेछ ।