इटहरी/ नेपाली बक्स अफिसमा ‘पूर्ण बहादुरको सारङ्गी’ मार्फत ४६ करोड ८० लाखभन्दा बढीको कीर्तिमानी व्यापार गरेर इतिहास रचेका निर्माता विनोद पौडेल अब अर्को सशक्त कथा लिएर दर्शक माझ आउँदैछन् । आफ्नो आगामी फिल्म ‘अभिमन्यु : च्याप्टर १’ को प्रदर्शन मिति नजिकिँदै गर्दा पौडेलले यसलाई ‘सानो सिनेमा’को कोटीमा नराख्न आग्रह गरेका छन् ।
निर्माता पौडेलले फिल्मको ‘साइज’ बजेट वा स्टारकास्टले नभई बक्स अफिस कलेक्सनले निर्धारण गर्ने तर्क अघि सारेका छन् । “जुन सिनेमाले धेरै कमाई गर्छ त्यो ठूलो र थोरै कमाउने सानो सिनेमा हो,” पौडेल भन्छन् । उनको यो तर्कलाई डेढ करोड लगानीमा बनेर झण्डै ४७ करोडको व्यापार गरेको उनकै अघिल्लो फिल्मले पुष्टि गरिसकेको छ ।
स्टारकास्ट हुँदैमा फिल्म चल्ने र नहुँदैमा नचल्ने भन्ने परम्परागत भाष्यलाई चुनौती दिँदै पौडेलले ‘अभिमन्यु’ लाई ‘अन्डर डग’हरूको फिल्म भनेका छन् । बारम्बार प्रदर्शन मिति सर्दा पनि उनमा देखिएको उच्च आत्मविश्वासले यो फिल्मले पनि बक्स अफिसमा केही सरप्राइज दिने अपेक्षा गरिएको छ ।
सेभेन सिज सिनेमाको प्रस्तुति रहेको ‘अभिमन्यु : च्याप्टर १’ यही मंसिर १८ गतेदेखि रिलिज हुँदैछ । विशेष कुरा त के छ भने, यो फिल्म नेपाली र हिन्दी दुवै भाषामा नेपाल लगायत भारत र विश्वभर एकसाथ प्रदर्शनमा आउनेछ । सुशान्त गौतमको निर्देशन र मुकेश खनालको लेखन रहेको यस फिल्ममा अभिनयको अब्बल क्षमता भएका कलाकारहरूको जमघट छ ।
@parikalanewsofficial
फिल्मको मुख्य कलाकारहरूमा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल र शिशिर वाङ्देल लगायत छन् । मदन थापा क्रिएटिभ निर्देशकको रुपमा छन् भने शरद महतो डिओपी, मनोज श्रेष्ठ भिएफएक्स, जुनिम गहतराज कलर र मदन घिमिरेले फिल्मको सम्पादन गरेका छन् ।
विनोद पौडेल र गुञ्जन गिरी निर्माता रहेको यस फिल्ममा रमेश चौलागाईं र हरि श्रेष्ठ सह–निर्माता छन् । त्यस्तै, कार्यकारी निर्मातामा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ रहेका छन् भने लाइन प्रोड्युसर जीवन शाक्य हुन् । ‘पूर्ण बहादुरको सारङ्गी’ को अभूतपूर्व सफलतापछि दर्शकको प्रतिक्षामा परेका विनोद पौडेलको यो ‘अभिमन्यु’ ले बक्स अफिसमा कस्तो जादु चलाउँछ, त्यो भने हेर्न बाँकी नै छ ।
Discussion about this post