फिल्म ‘परालको आगो’ सम्पूर्ण छायांकन सम्पन्न, सेटको ३ तस्वीर बाहिरियो

इटहरी/ नेपाली कथा-साहित्यको लोकप्रिय कृति ‘परालको आगो’ पुनः आधुनिक शैलीमा निर्माण हुँदै दृश्यात्मक स्वरुपमा फर्किन लागेको छ । गुरुप्रसाद मैनालीको ‘नासो’ सङ्ग्रहभित्रको चर्चित कथामाथि तयार भइरहेको यही नामको फिल्मले आफ्नो सम्पूर्ण छायाङ्कन कार्य सकिएको घोषणा गरेको छ । दसैँको माहोलसँगै म्याग्दीका आकर्षक स्थानमा सुरु भएको सुटिङ निर्धारित तालिका भन्दा १० दिन ढिलो गरी अन्ततः मङ्गलवार पूरा गरिएको निर्माण पक्षले जनाएको छ ।

सुटिङ सम्पन्नसँगै निर्माण टोलीले सुटिङ सेटको तीन फरक–फरक कलाकार ‘लुक्स’ सार्वजनिक गर्दै प्रदर्शन मिति पनि औपचारिक रूपमा बाहिर ल्याएको छ । फिल्म आगामी वैशाख ११ गते हलमा आउने तय समेत भएको छ । निर्माता सुशील पोखरेलका अनुसार प्रदर्शन मिति चयन गर्दा विशेष रणनीति अपनाइएको हो ।

उनका शब्दमा, “हामीले ठूला चाडपर्व वा भिड हुने महत्त्वपूर्ण डेटहरू जानीजानी छाड्यौँ । धेरै फिल्म एकैपटक रिलिज हुँदा निर्माता र हल व्यवसायी दुवैलाई नोक्सानी पुग्छ । त्यसैले दुवै पक्षलाई फाइदा हुने सोचका साथ वैशाख ११ गतेको सामान्य शुक्रवार ‘डेट लक’ गरेका हौँ ।”

@parikalanewsofficial

४५ वर्षअघि प्रताप सुब्बाद्वारा निर्माण भएर निकै सफल ठहरिएको ‘परालको आगो’ अहिले निर्देशक लक्ष्मण सुनारको निर्देशनमा नयाँ रूप लिन लागेको छ । सौगात मल्ल, प्रकाश सपुत, सुहाना थापा, सिर्जना अधिकारी, शङ्कर आचार्य, किशोर भण्डारी, कुलदीप अधिकारी, सरिता भण्डारी, रेणु न्यौपाने र बाल कलाकार एन्जिला बानियासहितको बलियो कलाकार टोलीले कथालाई आधुनिक स्वादमा पुनर्जीवित गर्ने अपेक्षा गरिएको छ ।