निर्देशक एकताले आधा दर्जनभन्दा धेरै स्क्रिप्टमध्ये ‘हर्ष’ छान्नुको कारण के हो ?

इटहरी/ नेपाली फिल्म उद्योगले नयाँ महिला निर्देशक पाउने दिन नजिकिँदैछ । यही मंसिर १२ मा रिलिज हुने फिल्म ‘हर्ष’ मार्फत निर्देशक एकता पौडेल पहिलोपटक नेपाली निर्देशनको दुनियामा प्रवेश गर्दै छन्, र उनको यो डेब्यूले फिल्म उद्योगभित्र नै उत्सुकता बढाएको छ । न्यूयोर्क फिल्म एकेडेमीमा अध्ययन गरेको अनुभव र दिवंगत निर्देशक शिव रेग्मीको परिवारसँगको नाता, यी दुवैले एकतालाई सुरुवातमै उच्च अपेक्षाको केन्द्रमा ल्याएको छ ।

पौडेल स्वयंले पनि यी अपेक्षा आफूलाई प्रेरणा र जिम्मेवारी दुवै भएको बताउँछिन् । आफूसँग भएका आधा दर्जनभन्दा धेरै स्क्रिप्टमध्ये ‘हर्ष’ छान्नुको कारण उनले यसले बोकेको पारिवारिक भावनात्मक केन्द्र हो भन्छिन् । सार्वजनिक ट्रेलरले पनि फिल्मलाई पारिवारिक कथावस्तुमा आधारित संवेदनशील प्रस्तुति भनेर स्थापित गरिसकेको छ ।

पौडेल भन्छिन्, “अहिले नेपाली फिल्मको व्यापार उत्साहजनक छ । जमल हुँदै आउँदा तीनवटा नेपाली फिल्मका पोस्टर देखेर मलाई आफ्नै फिल्मप्रति झनै सकारात्मक ऊर्जाको अनुभूति भयो । ‘हर्ष’ले मन छुने कथा भन्छ, पारिवारिक भावनालाई सम्मान गर्छ । शिव मामाले जति शतप्रतिशत दिन नसके पनि एउटा गहिरो विषयलाई सरल शैलीमा प्रस्तुत गर्ने प्रयास गरेकी छु ।”

@parikalanewsofficial

विदेशमा अध्ययनका समयमा विभिन्न देशका विद्यार्थीका दृष्टिकोण अवलोकन गर्दा आफूलाई भावना व्यक्त गर्ने शैली संस्कृतिले फरक बनाउँछ भन्ने बुझाइ मिलेको उनी बताउँछिन् । यही बुझाइका कारण ‘हर्ष’मा उनले नेपाली समाजको संरचना, परिवारको मनोविज्ञान र परिस्थितिलाई मुख्य केन्द्रमा राखेकी छन् । नेपालमा वंश निरन्तरता एक महत्वपूर्ण सामाजिक धारणा हो ।

यही धारणा पूरा नहुँदा उत्पन्न हुने दबाब, परिवारको प्रतिक्रिया र मनोवैज्ञानिक चोटपटक, यी सबैलाई ‘हर्ष’ले आफ्नो मूल विषय बनाएको निर्देशकको भनाइ छ । “छ-सातवटा स्क्रिप्टमध्येबाट यो कथावस्तु छान्नुको कारण, यसमा सार्वजनिक बहस आवश्यक छ भन्ने महसुस हो,” उनी थप्छिन् । “फिल्मले जटिल सिद्धान्त होइन, सहज तर प्रभावकारी ढङ्गले मनोरञ्जनमार्फत कुरा गर्छ ।” महिला निर्देशक र महिला–केन्द्रित कथावस्तुले ‘हर्ष’लाई महिलाको दृष्टिकोणबाट बनेको फिल्मका रूपमा पनि हेरिएको छ ।