यस्तो छ ‘अभिमन्यु’को हिन्दी टिजर, फिल्म यही १८ देखि प्रदर्शनमा हुने

इटहरी/ नेपाल र भारतको दर्शक बजारलाई एकैसाथ लक्ष्य बनाएको बहुभाषिक महत्वाकांक्षी फिल्म ‘अभिमन्यु : च्याप्टर १’ ले हिन्दी भर्सनको टिजर सार्वजनिक गर्दै आफ्नो प्रचारलाई तिब्र बनाएको छ । यही मंसिर १८ गते रिलिज हुन लागेको यो फिल्म नेपाली र हिन्दी दुवै भाषामा नेपाल, भारतसहित विश्वभर एकसाथ प्रदर्शनमा आउँदैछ ।

निर्माणपक्षका अनुसार भारत तथा ओभरसिजका हिन्दीभाषी दर्शकलाई केन्द्रमा राख्दै टिजर हिन्दी भर्सनमै रिलिज गरिएको हो । सार्वजनिक टिजरमा प्रेम, सस्पेन्स, पैसाको प्रलोभन, अपहरणदेखि सेयर बाँडफाँटसम्मका अनेक घटनाहरू कलात्मक ढङ्गले प्रस्तुत छन् । प्रहरी कस्टडीमा पुगेको एक पात्रको बयान र यसकै बीच–बीचमा देखाइएका रहस्यमय दृश्यहरूले मुख्य पात्र कसरी अपहरणकारीमा बदलिन्छ ? भन्ने ठूलो प्रश्न खडा गर्छ, जसलाई फिल्मले नै खोल्ने संकेत टिजरले गर्छ । हेर्नुस् टिजर ।

सेभेन सिज सिनेमाको प्रस्तुति यो फिल्ममा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल र शिशिर वाङ्देल मुख्य भूमिकामा छन् । फिल्मलाई सुशान्त गौतमले निर्देशन गरेका छन् भने क्रिएटिभ निर्देशक मदन थापा हुन् । लेखन मुकेश खनालको रहेको ‘अभिमन्यु : च्याप्टर १’ का निर्माता विनोद पौडेल र गुञ्जन गिरी हुन् ।

@parikalanewsofficial

यो फिल्मको सह–निर्मातामा रमेश चौलागाईं र हरि श्रेष्ठ छन् । कार्यकारी निर्माता विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ छन् । लाइन प्रोड्युसरमा जीवन शाक्य छन् । यस्तै प्राविधिक टिममा शरद महतो (डिओपी), मनोज श्रेष्ठ (VFX), जुनिम गहतराज (कलर ग्रेडिङ) र मदन घिमिरे (सम्पादन) मा रहेका छन् ।