‘मिस्टर एण्ड मिस लिटिल पुर्बेली’दोश्रो संस्करणको फाइनल अडिसन सम्पन्न

इटहरी/ बालबालिकाभित्र लुकेको प्रतिभालाई उजागर गर्ने र उनीहरूलाई भविष्यको एक उदाहरणीय पात्रको रूपमा स्थापित गर्ने उद्देश्यसहित ‘मिस्टर एण्ड मिस लिटिल पुर्बेली’को दोस्रो संस्करणको फाइनल अडिसन उत्साहजनक रूपमा सम्पन्न भएको छ । ओपन स्पेस प्रा.लि.को आयोजनामा जारी यस प्रतियोगिताको दोस्रो तथा अन्तिम अडिसन शनिबार इटहरीमा सम्पन्न भएसँगै अब फाइनल प्रतिस्पर्धाको तयारी सुरु भएको हो ।

शनिबार इटहरीस्थित फुडशाला क्याफेमा आयोजित अडिसनमा ३० जना बालबालिकाहरूले उत्साहजनक सहभागिता जनाएका थिए । सहभागी बालबालिकाहरूको प्रतिभा र आत्मविश्वासलाई मूल्याङ्कन गर्न निर्णायक मण्डलमा नृत्य कोरियोग्राफर मनिष गिरी, मिसेस पूर्वेली आइकन सिजन–२ (अर्गनाइजर च्वाइस) रेनेशा चौधरी र मिस एसईई इटहरी २०२४ (अर्गनाइजर च्वाइस) प्रियंका थापा रहेका थिए ।

प्रतियोगिताका निर्देशक सरोज श्रेष्ठका अनुसार यो प्रतियोगिता बालबालिकाका लागि मनोरञ्जन क्षेत्रमा प्रवेश गर्ने बलियो माध्यम बनेको छ । गत वर्ष सम्पन्न पहिलो संस्करणको सफलताको उदाहरण दिँदै उनले भने, “गत सिजनका प्रतिस्पर्धी अवि भट्टराईले चर्चित अभिनेता सौगात मल्लको बाल्यकालको भूमिका निर्वाह गर्दै फिल्म ‘बलिदान’ मा अभिनय गर्ने अवसर पाए । यसले पुष्टि गर्छ कि हामी बालबालिकालाई केवल ताज मात्र होइन, भविष्यको बाटो पनि देखाइरहेका छौँ ।”

@parikalanewsofficial

आयोजकका अनुसार अब छनौट भएका प्रतिस्पर्धीहरूलाई विशेष बन्द प्रशिक्षणमा लगिनेछ । आयोजक संस्थाकी सीईओ सजिना श्रेष्ठले बालबालिकाको चौतर्फी विकासलाई केन्द्रमा राखेर तालिम सञ्चालन गरिने जानकारी दिइन् । “हामी बालबालिकालाई र्याम्पमा हिँड्न मात्र सिकाउँदैनौँ, उनीहरूको बौद्धिक र मानसिक विकासमा पनि उत्तिकै ध्यान दिन्छौँ,” सीईओ श्रेष्ठले भनिन् ।

प्रशिक्षणका क्रममा प्रतिस्पर्धीहरूलाई र्याम्प वाक, व्यक्तित्व विकास, वाककला, प्रश्नोत्तर शैली र योगा जस्ता महत्त्वपूर्ण विषयहरूमा विज्ञहरूद्वारा प्रशिक्षण दिइनेछ । यस प्रतियोगिताले बालबालिकाको बौद्धिक क्षमता निखार्दै उनीहरूलाई भावी कला तथा फेसन क्षेत्रका लागि समेत सक्षम बनाउने विश्वास आयोजकले लिएको छ ।