अबिषेक र आकृतिको डेब्यु फिल्म ‘कुमारी’ सुटिङ सम्पन्न, इन्डष्ट्रीमा जम्ला त क्यामेष्ट्री ?

इटहरी/ नेपाली फिल्म क्षेत्रमा चासो बढाइरहेको प्रेमकथानक फिल्म ‘कुमारी’ले हालै छायांकन सम्पन्न गरेको छ । २ महिनाभन्दा लामो छायाङ्कनको यात्रा शनिवार सम्पन्न भएपछि टिम अब पोस्ट–प्रोडक्सनमा प्रवेश गरेको छ । फिल्मको छायांकन गत भाद्र १७ गतेदेखि सुरुभएर हिजो कार्तिक २९ गते सकिएको हो ।

निर्देशक दिनेश राउतले सम्पादनको कार्य सुरु गरेसँगै केही दिनमै आधिकारिक प्रदर्शन मिति सार्वजनिक गर्ने तयारी भइरहेको बताए । फिल्मले आजसम्म कमाएको सबैभन्दा ठूलो हिस्सा भने यसको घोषणा समारोहमै प्रत्यक्ष प्रस्तुत गरिएको गीत ‘कता छौ मेरो फूल’ हो । जुन, इन्टरनेटभर फैलिएको यो गीत अहिले देश-विदेशमा कन्सर्ट गरिरहेका गायक केहर सिंहको प्रमुख प्रस्तुति बनेको छ ।

‘केहर एन्ड द लुङा’ ब्यान्डको लाइभ भर्सन टिकटक र युट्युबमा यति लोकप्रिय बनेको छ कि ‘जेन–जी’ समूहले सर्वाधिक प्रयोग गर्ने गीतको सूचीमा परेको छ । यसको स्टुडियो भर्सन भने फिल्म रिलिजसँगै मात्रै सार्वजनिक हुनेछ । ‘कुमारी’ले नयाँ पुस्ताका दुई अनुहारलाई मुख्य पात्रको रूपमा दर्शकमाझ ल्याउँदैछ, अबिषेक खड्का र आकृति राजभन्डारी ।

यी २ को डेब्युका साथै घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ, सकु शाह, सरोज लामिछाने, मनीषा शर्मा र भूपी लुहारले पनि यो फिल्ममा अभिनय गरेका छन् । फिल्मको छायाङ्कन सुसन प्रजापतिले गरेका हुन् । बिनिश इन्टरटेन्मेन्ट र पिक्चर फ्रेमको सहकार्यमा निर्माण भइरहेको फिल्मका निर्माता महेन्द्र अधिकारी हुन् भने कथा तथा स्क्रिप्ट विकास सुवेदीले लेखेका छन् ।

@parikalanewsofficial

चार गीत समावेश गरिएको फिल्ममा सबै गीतमा नै केहर सिंह लिम्बुको स्वर सुन्न सकिन्छ । संगीत संयोजनमा केहर सिंहसँगै सुमन तामाङ र प्रशान्त सिवाकोटी छन् भने शब्द–लेखन सागर लामिछाने मगर, सुमन तामाङ र युवराज काफ्लेद्वारा गरिएको हो । निर्माण टिमले ‘कुमारी’ यही वर्षभित्रै दर्शकमाझ ल्याउने योजना बनाएको छ । छायाङ्कन सम्पन्न भएसँगै ‘कुमारी’ अब पोस्ट प्रोडक्सन, प्रचारप्रसार र रिलिजको चाँजोपाँजो तर्फ अघि बढेको छ ।