दोस्रो हप्तामा ‘मन बिनाको धन’, कतारमा पाएको दुबै शो हाउसफुल

इटहरी/ बालगायक अशोक दर्जीको वास्तविक जीवनमा आधारित फिल्म ‘मन बिनाको धन’ले नेपाली बक्स अफिसमा ऐतिहासिक सफलता हासिल गर्दै दोस्रो हप्तामा प्रवेश गरेको छ । पहिलो हप्तामै १ करोड ६७ लाख बढीको व्यापार गर्न सफल यो फिल्मले नेपालसहित अब अन्तर्राष्ट्रिय बजारमा समेत नयाँ रेकर्ड बनाएको छ ।

नेपालसँगै यो फिल्म बिहीबारदेखि कतार, युएई र बहराइनमा प्रदर्शन भइरहेको छ । खाडी क्षेत्रका वितरकहरूका अनुसार, कतारमा फिल्मले बिहीबार र शुक्रबार प्रदर्शनको लागि पाएका दुवै सो हाउसफुल भएका छन् । वितरकले यो सफलतालाई ‘कतारमा दुई सो नै हाउसफुल हुने पहिलो नेपाली फिल्म’ बनेको घोषणा गरेका छन् ।

हरि मोक्तान, कृष्ण भट्टराई र साथीभाई इन्टरटेन्मेन्टले कतार, युएई र बहराइनमा वितरणको जिम्मा लिएका हुन् । उनीहरूका अनुसार युएई र बहराइनमा समेत फिल्मले उत्कृष्ट व्यापार गरिरहेको छ र सकारात्मक प्रतिक्रिया पाएको छ ।

नेपालमा प्रदर्शनको दिनदेखि नै प्रायः सबै हलमा हाउसफुलको व्यापार गरेको यो फिल्मले दर्शकको गहिरो भावनात्मक साथ पाएको छ । फिल्मको प्रमोशन तथा हल भिजिटमा पुगेका मुख्य कलाकार अशोक दर्जीलाई राजधानीमा दर्शकले रुँदै अँगालो हालेका दृश्यहरू सामाजिक सञ्जालमा भाइरल बनेका छन् ।

@parikalanewsofficial

स्कुले विद्यार्थीदेखि उनीहरूका बुबाआमासम्म हलबाट रुँदै निस्केको देखिनुले फिल्मले दर्शकको मन कति गहिराइबाट छोएको छ भन्ने स्पष्ट हुन्छ । कतिपय दर्शकले सामाजिक सञ्जालमा टिकट नपाएको गुनासो समेत व्यक्त गरेका छन् । आगामी दिनमा यो फिल्म साउदी अरब, कोरिया लगायतका देशहरूमा समेत प्रदर्शन हुने तयारीमा रहेको छ ।

टंक बुढाथोकीको निर्माण तथा निर्देशन रहेको ‘मन बिनाको धन’ को कथा उनैले लेखेका हुन् भने पटकथा र संवाद शिवम अधिकारीले लेखेका छन् । फिल्ममा बालगायक अशोक दर्जीसँगै सरोज खनाल, सन्तोष पन्त, नीता ढुंगाना, भोला सापकोटा, बुद्दि तामाङ, रमेश विश्वकर्मा, रवीन्द्र झा, पार्वती अधिकारी लगायतका वरिष्ठ र लोकप्रिय कलाकारहरूको अभिनय रहेको छ ।

टंक बुढाथोकी प्रोडक्सनको प्रस्तुतिमा बनेको यस फिल्मलाई विष्णुमाया मैनालीले निर्माण गरेकी हुन् भने मिनु शर्मा (सपना) कार्यकारी निर्माता र जी.पी संग्रोला, बिबेक नेपाल तथा बिजया पाण्डे सहनिर्मातामा रहेका छन् । टिकाराम बुढाथोकी क्रियटिभ निर्देशक हुन् ।