इटहरी/ परिवार र सम्बन्ध बीचको भावनाको गहिरो कथालाई पर्दामा उतार्न तयार रहेको फिल्म ‘आ बाट आमा’ निर्माण युनिटले दोस्रो चरणको आधिकारिक पोस्टरहरू सार्वजनिक गरेको छ । निर्देशक चन्द्र पन्तको यस भावनात्मक प्रस्तुतिले सार्वजनिक दुई पोस्टरमार्फत दर्शकहरूलाई कथाको भावनात्मक सारमा डोऱ्याएको छ । पोस्टरमा कलाकारहरूको मुहारमा खुसी र पीडाको विरोधाभासपूर्ण भाव देखिएको छ, जसले फिल्ममा आउने भावनात्मक उतारचढावलाई स्पष्ट सङ्केत गर्छ ।
विशेषगरी, पोस्टरमा गाउँले जीवन र विदेशको पृष्ठभूमिको प्रयोगका कारण रहरले गर्दा भएको प्रवास वा बाध्यताले गर्दाको विछोडको कथालाई केन्द्रमा राखिएको प्रस्ट हुन्छ । फिल्मका मुख्य आकर्षणहरूमध्ये एक पल शाह दुई फरक लुक्समा देखिएका छन् । एकमा लामो कपालसहितको गेटअप र अर्कोमा छोटो कपाल । यसले फिल्ममा उनको दोहोरो भूमिका हुने सम्भावनालाई बलियो बनाएको छ ।
सार्वजनीक पोस्टरमा विपना थापा, प्रदीप रावत (गजनी भिलेन), सिम्रन पन्त, साइग्रेस पोखरेल र उषा उप्रेती मुख्य भूमिकामा छन् । फिल्ममा विशाल पहाडी, रवीन्द्र झा, गजित बिष्ट, हेमराज अधिकारी (खनत्या खलास), दीलिप उखेडा, रचना गौतम लगायतका कलाकारहरूको पनि अभिनय रहेको छ । आर्या इन्टरटेन्मेन्टको ब्यानरमा बनेको यो फिल्मलाई निर्देशक चन्द्र पन्तले नै लेखेका हुन् ।
फिल्मका निर्माताहरूमा ओमकार पन्त, कृष्णप्रसाद सुवेदी, ध्रुव न्यौपाने, प्रकाश कुँवर र क्षितिज ढुङ्गाना रहेका छन् भने कार्यकारी निर्मातामा करण सिंह रसाइली रहेका छन् । यसमा नवराज उप्रेतीको डिओपी तथा कोशिश क्षेत्री, बाबुल गिरी र थानेश्वर गौतमको संगीत रहेको छ । पारिवारिक कथावस्तुमा आधारित यो फिल्म शहीद दिवसको अवसर पारेर आगामी आउँदो माघ १६ गतेबाट देशभर प्रदर्शनमा आउँदैछ । यसले अन्तर्राष्ट्रिय बजारमा राम्रो व्यापारको सङ्केत गरिसकेको छ भने अस्ट्रेलिया र न्युजिल्याण्डको प्रदर्शन अधिकार बिक्री भइसकेको छ ।
@parikalanewsofficial
Discussion about this post