फिल्म ‘झिँगेदाउ २’मा मुकुन भुषाल नरहने, उनको ठाउँमा भित्रिए महेश त्रिपाठी

इटहरी/ निर्माणको अन्तिम तयारीमा पुगेको फिल्म ‘झिँगेदाउ २’ अब छायांकनको चरणमा प्रवेश गर्न लागेको छ । निर्देशक तथा निर्माता ज्ञानेन्द्र देउजाले आउँदो मंसिर १५ गते (सोमबार) शुभमुहूर्त गर्दै छायांकन सुरु गर्ने घोषणा गरेका छन् । तर, छायांकनको अन्तिम तयारीका बीचमा नै फिल्म युनिटले एउटा ठुलो परिवर्तन गरेको छ । त्यो हो, मुख्य कलाकारको हेरफेर ।

पहिलो भाग ‘झिँगेदाउ’बाट दर्शकमाझ लोकप्रिय बनेका मुकुन भुषाललाई यो सिक्वेलमा महेश त्रिपाठीले प्रतिस्थापन गर्ने भएका छन् । निर्देशक देउजाका अनुसार छायांकन तालिका मिलाउन नसक्दा विवाद उत्पन्न भएपछि मुकुनको ठाउँमा महेशलाई अनुबन्धित गरिएको हो । उनले भने, “सेड्युलको कारणले लामो समयदेखि रोकिएको छायांकन अब अघि बढाउने निर्णय गरेका छौँ ।”

कपनगढी सिनेमा प्रालीको व्यानरमा निर्माण हुन लागेको यो फिल्ममा महेश त्रिपाठीसँगै आर्यन सिग्देल, सरोज खनाल, बसुन्धरा भुषाल, चैत्यदेवी सिंह लगायतका नयाँ अनुहारहरू समावेश गरिएका छन् । यसअघि जस्तै केकी अधिकारी, आँचल शर्मा, कुशल विष्ट, अंशु महर्जन, विजय देउजा, संगम भण्डारी, हिउँवाला गौतम, आयन खड्का आदि कलाकार भने यथावत् रहनेछन् ।

@parikalanewsofficial

फिल्मका निर्माता शुलभ प्रतिक देउजा र समीक्षा देउजा हुन् । ईश्वर घिमिरे प्रोडक्सन हेडका रूपमा रहने यस फिल्ममा बिष्णु कल्पितको छायांकन, अर्जुन पोखरेलको संगीत, रोशन श्रेष्ठको द्वन्द्व निर्देशन र मित्र डि गुरुङको सम्पादन रहनेछ । निर्देशक देउजाले ‘झिँगेदाउ २’ लाई आगामी वर्षको दशैंमा रिलिज गर्ने योजना बनाएका छन् । देशभरका हलमा यसको वितरण एप्पल इन्टरटेनमेन्टले गर्नेछ ।