प्रदर्शनरत फिल्म ‘मन बिनाको धन’को ‘बा आमा’ बोलको गीत सार्वजनिक

इटहरी/ देशभर प्रदर्शन भइरहेको पारिवारिक कथा र भावनाले भरिएको फिल्म ‘मन बिनको धन’ले दर्शकको मन जित्दै भावनात्मक माहोल सिर्जना गरेको छ । वास्तविक जीवनमा बालगायक अशोक दर्जीका जीवनका उतार–चढाव र संघर्षलाई केन्द्रमा राखिएको यस फिल्मले विशेषगरी पारिवारिक मूल्य र आमाबाबुको माया लाई मार्मिक रूपमा प्रस्तुत गरेको छ । यस्तै गुरु र चेलाको सम्बन्धलाई भावनात्मक ढङ्गले प्रस्तुत गरिएको छ ।

हालै सार्वजनिक गरिएको फिल्मको गीत ‘बा आमा’ ले पनि दर्शकको मन छोएको छ । अशोक दर्जी र ए.आर. बुढाथोकी को स्वरमा रहेको उक्त गीतमा टंक बुढाथोकीको संगीत र एरेन्ज तथा शंकर आचार्यको शब्द रहेको छ । गीतले अभिभावकप्रतिको सन्तानको भावनात्मक सम्बन्धलाई उजागर गर्छ । गत शुक्रबारदेखि प्रदर्शनमा आएको फिल्मलाई देशैभरका हलमा राम्रो प्रतिक्रिया मिलिरहेको छ । हेर्नुस् भिडीयो ।

पहिलो दिन ९५ शो बाट सुरुवात गरेको फिल्मले अहिले सवा सय शोको हाराहारीमा प्रदर्शन पाएको छ । अधिकांश हलमा हाउसफुल शो भइरहेको छ । फिल्म हेर्न जेनजी पुस्तादेखि ज्येष्ठ नागरिकसम्म, स्कुले विद्यार्थीदेखि अभिभावकसम्म हलमा उपस्थित हुने क्रम बढिरहेको छ । केही दृश्यमा दर्शकहरू अशोक दर्जीलाई अँगालो हालेर रुँदै निस्किएको भिडियोहरू सामाजिक सञ्जालमा भाइरल भइरहेका छन् ।

दर्शकको प्रतिक्रियासँग जोडिन कलाकार र निर्माण टिम काठमाण्डौंका विभिन्न हलदेखि काठमाण्डौ बाहिरका हलसम्म पुगेका छन् । फिल्ममा अशोक दर्जी, सरोज खनाल, सन्तोष पन्त, रमा थपलिया, नीता ढुंगाना, रमेश विश्वकर्मा, भोला सापकोटा, बुद्धि तामाङ, रवीन्द्र झा, शंकर श्रेष्ठ, साम्राज्ञी थापा, बिना राउत, ए.आर. बुढाथोकी, बाबु पराजुली लगायत कलाकारहरूको अभिनय रहेको छ ।

@parikalanewsofficial

टंक बुढाथोकी निर्देशित र निर्माण रहेको यस फिल्मको कथा पनि उनैले तयार पारेका हुन्, भने पटकथा र संवाद शिवम अधिकारीले तयार पारेका हुन् । टंक बुढाथोकी प्रोडक्सन को ब्यानरमा निर्माण भएको फिल्मका निर्मात्री विष्णुमाया मैनाली र कार्यकारी निर्मात्री मिनु शर्मा (सपना) हुन् । सहनिर्मातामा जी.पी. संग्रोला, विवेक नेपाल र बिजया पाण्डे रहेका छन् ।

फिल्ममा सौरभ लामाको छायांकन, मित्र डी. गुरुङको सम्पादन, कविराज गहतराज र रामजी लामिछानेको कोरियोग्राफी र नवराज शर्माको मुख्य सहायक निर्देशन रहेको छ । फिल्मको क्रियटिभ निर्देशन टिकाराम बुढाथोकीले सम्हालेका छन् । ‘मन बिनको धन’ लाई एप्पल इन्टरटेन्मेन्ट, रीच इन्टरटेन्मेन्ट र एफडी कम्पनीले देशभर वितरण गरिरहेका छन् ।