कोशी प्रदेशका जारी २ दर्शकलाई प्रत्यक्ष भेटेर निर्देशकसहित मिरुना र सृजनाले दिए धन्यवाद

इटहरी/ देशभर उत्कृष्ट व्यापार गरिरहेको फिल्म ‘जारी २ : सङ अफ च्याब्रुङ’ अहिले विशेषगरी कोशी प्रदेशका हलहरूमा धमाकेदार प्रदर्शन भइरहेको छ । गएको शुक्रबारदेखि रिलिज भएको यो फिल्मले रिलिजको केही दिनमै बक्सअफिसमा उल्लेखनीय कलेक्सन गर्न सफल भएको छ ।

लिम्बु समुदायको कथामा आधारित यो फिल्म दर्शकबीच राम्रो प्रतिक्रिया पाएसँगै निर्देशक उपेन्द्र सुब्बा र मुख्य अभिनेत्रीहरु मिरुना मगर र सृजना निङ्लेखु स्वयं कोशी प्रदेशका दर्शक भेट्न आएका हुन् । सोमबार उनीहरूले झापाको दमक र बिर्तामोडमा दर्शकसँग प्रत्यक्ष भेटेर धन्यवाद दिए भने मंगलबार धरान र इटहरीका हलहरूमा भेटघाट सम्पन्न गरेका छन् ।

निर्देशक सुब्बाका अनुसार मंगलबारदेखि फिल्मको ‘डिरेक्टर्स कट’ भर्सन प्रदर्शनमा आएको छ, जसमा १४ मिनेट नयाँ दृश्य थपिएको छ । “पूर्वका दर्शकको माया र उत्साहले हामीलाई अझ उत्कृष्ट सिर्जना ल्याउने प्रेरणा दिएको छ,” सुब्बाले बताएका छन् ।

@parikalanewsofficial

मुख्य अभिनेत्री मिरुना मगरले पनि नयाँ संस्करणप्रति दर्शकको उत्साह देखेर खुसी व्यक्त गरिन् । उनले भनिन्, “दमक र बिर्तामोडमा दर्शकको अपार माया पायौं, धरान र इटहरीमा पनि उस्तै साथ थियो । धरान मेरो होमटाउन भएकाले यो यात्रा झन् विशेष लाग्यो ।”

उपेन्द्र सुब्बा लिखित र निर्देशित यो फिल्मलाई रामबाबु गुरुङ, मधु मिजार र जीवन गुरुङले निर्माण गरेका हुन् । प्रमुख भूमिकामा दयाहाङ राई, मिरुना मगर र विजय बराल छन् भने बुद्धि तामाङ, ऋचा शर्मा, पुष्कर गुरुङ, प्रेम सुब्बा, माओत्से गुरुङलगायत कलाकारहरूको पनि दमदार अभिनय रहेको छ । बाँसुरी फिल्म्स र कबड्डी फिल्म्सको संयुक्त ब्यानरमा बनेको ‘जारी २’ यो वर्षको सबैभन्दा सफल व्यापार गर्ने फिल्महरूमा गनिन थालेको छ ।