फिल्म ‘भाइटीका’मा धीरज मगरको ठाउँमा भित्रिए कुल व्वाई

इटहरी/ टिकटकबाट चर्चित भएर ‘होस्टेल ३’ मार्फत फिल्मी यात्रा सुरु गरेका पारस बम ठकुरी (कुल व्वाई) लामो समय ‘लो–प्रोफाइल’मा देखिए पनि अब एकैपटक सक्रिय बन्दै पुनः रफ्तार समाउने मूडमा पुगेका छन् । डेब्यु फिल्म पछि होस्टेल ३ का अन्य कलाकारहरू एकपछि अर्को प्रोजेक्टमा व्यस्त हुँदा पारस भने नयाँ फिल्मका लागि निकै सोचविचारमा रहेका थिए ।

अब भने उनले दोस्रो फिल्मको लागि ठूलो छलाङ मारेका छन् । निर्माता रोहित अधिकारीको आगामी फिल्म ‘भाइटीका’ मा उनी आधिकारिक रूपमा अनुबन्ध भएको पुष्टि भएको छ । अझै रोचक त के छ भने उनले यो फिल्ममा धीरज मगरको ठाउँ कब्जा गरेका छन् । अर्थात् अभिनेता मगर भाइटीका बाट बाहिरिएपछि उनको ठाउँमा कुल ब्वाई भित्रिएका हुन् । पारसको लोकप्रियता र उनको स्टारडमले गर्दा र कथामा उनी फिट हुनेभएपछि फिल्ममा अनुबन्ध गरिएको निर्माता रोहित अधिकारीले जानकारी दिए ।

दिपक वलीले निर्देशन गर्ने यस फिल्मको छायांकन यो वर्षको अन्त्यतिर सुरु हुने तयारी छ । यति मात्र होइन, पारसले दुई अन्य फिल्महरूमा पनि काम गर्ने सहमति गरिसकेको बुझिएको छ । एकको छायांकन तयारी अन्तिम चरणमा पुगेको छ भने ‘होस्टेल ३’ निर्माण टिमले बनाउन लागेको नयाँ फिल्ममा समेत उनलाई देख्न सकिने चर्चा चुलिएको छ ।