इटहरी/ नेपाली फिल्म ‘सुम्निमा’ पछिल्लो समय कलाकार परिवर्तनका कारण चर्चामा रह्यो । छायांकनको पहिलो चरणकै लागि लन्डन पुगेकी अभिनेत्री उपासना सिंह ठकुरी र निर्माण टिमबीच उत्पन्न मतभेदपछि उपासना यो फिल्मबाट बाहिरिएकी थिइन् । त्यसपछि फिल्म युनिटले उनको ठाउँमा नयाँ अभिनेत्रीको खोजी तीव्र बनायो र अन्ततः लन्डनमै बसोबास गर्दै आएकी सोल गुरुङलाई मुख्य भूमिकामा फाइनल गर्दै निर्माण टिमले फिल्म छायांकन गरेको थियो ।
लन्डनमा पहिलो चरणको छायांकन पूरा गरेपछि टिम अहिले नेपाल फर्किएको छ । सोही मेसोमा फिल्मका निर्देशक मिलन चाम्सले सोलको केही तस्वीर सामाजिक सञ्जालमा सार्वजनीक गर्दै सुम्निमामा उनलाई लिइएको जानकारी गराए । केही म्युजिक भिडियोमा मोडलिङ गर्दै आएका सोल अब पहिलो पटक ठूलो पर्दामा अभिनेत्रीको रुपमा डेब्यु गर्दैछिन् ।
गोर्खा फिल्म्स र चाम्स इन्टरटेन्मेन्टको संयुक्त लगानीमा बन्ने यो फिल्म नामले नारीकथाको संकेत गरे पनि निर्देशक मिलन चाम्सले ‘सुम्निमा’ एक शुद्ध प्रेमकथा हुने स्पष्ट पारेका छन् । फिल्ममा सोलसँगै कुन्साङ बमजन, अनुप विक्रम शाही, धिरेन शाक्य, माओत्से गुरुङ, सुरज तमु, आकाश सुनुवार, सलिना थापा र सुस्मा सुब्बा प्रमुख भूमिकामा देखिनेछन् ।
@parikalanewsofficial
राजीव थापाको लेखनमा तयार हुँदै गरेको फिल्मलाई अन्तर्राष्ट्रिय दर्शकलाई लक्षित गर्दै निर्माण गरिन लागेको निर्देशक चाम्सले बताए । पहिलो चरण लन्डनमा सकेपछि अब दोस्रो चरणको छायांकन नेपालमा हुने तयारी भइरहेको छ । ‘विर विक्रम’, ‘लिली बिली’, ‘ब्लाइण्ड रक्स’, ‘बबी’, ‘गोर्खा वारियर’ र ‘अञ्जिला’ जस्ता सफल फिल्म निर्देशन गरिसकेका मिलन चाम्सको पछिल्लो फिल्म ‘अञ्जिला’ ले नेपाली बक्स अफिसमा नयाँ इतिहास बनाएको थियो । अब ‘सुम्निमा’ले नयाँ अनुहार, नयाँ कथा र नयाँ ऊर्जा सहित दर्शक माझ उत्सुकता बढाएको छ ।
Discussion about this post