इटहरी/ नेपालको पूर्वी चितवनस्थित रत्ननगरबाट बहुप्रतिक्षित फिल्म ‘राम नाम सत्य’को छायांकन औपचारिक रूपमा सुरु भएको छ । यो फिल्मको निर्देशक माइकल चन्दले झण्डै ८० प्रतिशत छायांकन चितवनमै सम्पन्न गर्ने योजना रहेको जानकारी दिएका छन् । उनका अनुसार, ४० दिन चितवनमा र १० दिन मुस्ताङमा फिल्म खिचिनेछ ।
रत्ननगरको जिरौनास्थित धर्मधाम कृष्ण मन्दिरमा प्रहरी प्रमुख एसपी गोविन्द पुरीले क्ल्याप बजाएर छायांकनको शुभारम्भ गरेका थिए । लाइन प्रोड्युसर राजेन्द्र आचार्यका अनुसार, यो प्रोजेक्टले चितवनलाई फिल्म सिटीको रूपमा चिनाउन र पर्यटन प्रवर्द्धनमा सहयोग पुर्याउने अपेक्षा गरिएको छ ।
यो फिल्म चैत्र २७ गते रिलिज गर्ने तयारी गरिएको छ । फिल्ममा विराज भट्ट, सुशील श्रेष्ठ, आयुषसिंह ठकुरी, सुपुष्पा भट्ट, दिव्या रायमाझी, आशा पौडेल, खुशी कार्की, सुनिल थापा, प्रशान्त ताम्राकार, कनिज कोइराला, रवि गिरी, दिनेश डीसी लगायतका कलाकारहरू मुख्य भूमिकामा छन् । साथै, राजेन्द्र आचार्य, अर्जुन सुनार, रामेश्वर शाह र पुजन लामिछाने विशेष भूमिकामा देखिनेछन् ।
फिल्मका निर्माता उपेन्द्र शाही र स्वेता बिमली, कार्यकारी निर्माता किशोर भट्ट र राजेन्द्र भट्ट, तथा क्रियटिभ निर्माता मोती कार्की हुन् । फिल्मको डीओपी मानकृष्ण महर्जन, एक्सन निर्देशक श्री श्रेष्ठ र संगीत संयोजन अर्जुन पोखरेल, एसडी योगी, विमल गिरी र नवाज अन्सारीले गरेका छन् ।
@parikalanewsofficial
फिल्मको पब्लिसिटी डिजाइन विजय बस्याल र प्रोडक्सन डिजाइन विदुषी थापाले सम्हालेका छन् । एक्सन, सस्पेन्स र प्रेम मिश्रित जनरामा तयार हुने ‘राम नाम सत्य’लाई निर्देशक माइकल चन्दले आफ्नो ड्रिम प्रोजेक्टका रूपमा प्रस्तुत गरेका छन् । उनका अनुसार, फिल्मले मनोरञ्जनसँगै नेपाली समाजको यथार्थ चित्रण पनि गर्नेछ ।
Discussion about this post