‘जारी २’ भोलिदेखि विश्वव्यापी प्रदर्शनमा, साउण्ड क्वालिटीबारे हलहरूलाई विशेष निर्देशन

इटहरी/ बहुप्रतिक्षित नेपाली फिल्म ‘जारी २ : सङ अफ च्याब्रुङ’ भोलि शुक्रबार अर्थात् कार्तिक २१ गतेबाट विश्वव्यापी रूपमा प्रदर्शनमा आउँदैछ । प्रदर्शन अघि निर्माण टिमले फिल्म हल सञ्चालकहरूलाई साउण्ड लेभल परीक्षण (टेस्ट रन) गर्न विशेष अनुरोध गरेको छ, ताकि दर्शकले उच्च गुणस्तरको साउण्ड अनुभव गर्न सकून् ।

बिहीबार सार्वजनिक गरिएको विज्ञप्तीमार्फत निर्माण टिमले जनाएको छ, “फिल्मको साउण्ड मिक्सिङ इमर्सिभ फर्म्याटमा (Dolby Atmos, DTS:X र Auro Max) सम्पन्न गरिएको छ, जसले दर्शकलाई फरक र वास्तविक ध्वनि अनुभव दिनेछ।” मिक्सिङ डल्बी फेडर युनिट ५.८ मा गरिएको हुँदा हलहरूले प्रदर्शन अघि न्यूनतम भोल्युम युनिट ५ बाट टेस्ट रन गर्न अनुरोध गरिएको छ ।

विज्ञप्तीमा थप भनिएको छ, “यदि फिल्मलाई ३, ३.५ वा ४ युनिटमा चलाइयो भने साउण्ड सानो सुनिन सक्छ, त्यसैले मापदण्ड अनुसारको भोल्युम स्तर कायम गरिनु जरुरी छ।” निर्माण पक्षका अनुसार कतिपय हलहरूले ‘साउण्ड बढी हुन्छ’ भन्दै भोल्युम घटाउने प्रचलनले साउण्ड डिस्टोर्सन र क्वालिटी ह्रास ल्याउने भएकाले त्यस अभ्यास नगर्न सुझाव दिइएको छ ।

@parikalanewsofficial

त्यस्तै, ‘जारी २ : सङ अफ च्याब्रुङ’ आजै सेन्सर पास पनि भएको छ । चलचित्र जाँच पास समितिले यसलाई ‘युनिभर्सल सर्टिफिकेट’ प्रदान गरेको छ, जसअनुसार सबै उमेर समूहका दर्शकहरूले फिल्म हेर्न सक्नेछन् । सेन्सर बोर्डका सदस्यहरूले लिम्बु समुदायको कथा प्रस्तुत गरिएको यस फिल्मलाई उत्कृष्ट प्रतिक्रिया दिएका छन् । लेखक तथा निर्देशक उपेन्द्र सुब्बा निर्देशित यस फिल्ममा दयाहाङ राई, मिरुना मगर र विजय बराल मुख्य भूमिकामा छन् ।

रामबाबु गुरुङ, मधु मिजार र जीवन गुरुङले निर्माण गरेको फिल्म बाँसुरी फिल्म्स र कबड्डी फिल्म्सको संयुक्त प्रस्तुति हो । यो फिल्ममा बुद्धि तामाङ, ऋचा शर्मा, पुष्कर गुरुङ, प्रेम सुब्बा, माओत्से गुरुङ, मानहाङ लावती, विष्णु मोक्तान, कमलमणि नेपाल, अनिल सुब्बा, रेखा लिम्बु, बेदना राई र सिर्जना निङ्लेखुको पनि अभिनय रहेको छ । उत्कृष्ट कथा, प्राविधिक पक्ष र सांगीतिक वातावरणका कारण ‘जारी २’लाई यस वर्षको व्यावसायिकरूपमा सफल हुने सम्भावना भएका फिल्ममध्ये एक मानिएको छ ।