‘मन बिनाको धन’लाई न्यून शो दिएकोमा निर्देशकको चित्त दुखाइ, दर्शकमाझ न्यायको अपेक्षा

ईटहरी/ प्रतीक्षित फिल्म ‘मन बिनाको धन’ भोलि शुक्रबार देखि देशभर सार्वजनिक प्रदर्शनमा आउँदै गर्दा यसका कथा लेखक, संगीतकार तथा निर्देशक टंक बुढाथोकीले फिल्म हल सञ्चालकहरूले दिएको शो संख्याप्रति निराशा व्यक्त गरेका छन् । उनले सामाजिक सञ्जालमार्फत भावुक हुँदै, आफू र बालगायकबाट नायक बनेका अशोक दर्जीले हार स्वीकार गर्नुपरेको जस्तो अनुभूति भएको जनाएका छन् ।

निर्देशक बुढाथोकीले आफ्नो आधिकारिक सामाजिक सञ्जालमा लेखेको स्ट्याटस अहिले चर्चामा छ । उनले फिल्म उद्योगमा हुने गरेका अप्ठ्याराहरूलाई संकेत गर्दै, “म हार्दैछु, मलाई हराउन धेरै लागे, सधै लागे … ठीकै छ… सिनेमाघर सञ्चालकहरूले ‘मन बिनाको धन’ लाई नपत्याए पनि, हामीलाई हजुरहरुले पत्याउनु भएको छ।” भनेर लेखेका छन् ।

उनले भोलिबाट प्रदर्शनमा आउने फिल्मलाई एकदमै कम शो दिइएको र कतिपय ठाउँमा शो नै नदिने निर्णयले आफू अत्यन्तै दुःखी भएको बताएका छन् । “भोलीबाट प्रदर्शन हुने हाम्रो चलचित्र “मन बिनाको धन” को शो एक्दमै कम दिने, कति पय ठाउमा नदिने निर्णयले दुःख लागेको छ, म हार्दैछु म सङ्गै अशोक ले पनि हार्दैछ्न ।”

@parikalanewsofficial

बुढाथोकीले न्यून शो दिइएका कारण आफ्नो फिल्मले ठूलो पर्दामा पर्याप्त अवसर नपाएकोतर्फ संकेत गर्दै, अन्तिममा दर्शकलाई नै न्यायका लागि गुहार मागेका छन् । बालगायक अशोक दर्जीको जीवनमा आधारित यस फिल्मले दर्शकमाझ राम्रो प्रतिक्रिया पाउनेमा निर्माण पक्ष आशावादी भए पनि, प्रदर्शनको पहिलो दिनमै न्यून शो पाउनुले उनीहरूलाई चिन्तित बनाएको छ ।

‘मन बिनाको धन’ मा अशोक दर्जीसहित सरोज खनाल, नीता ढुंगाना, सन्तोष पन्त, रमा थपलिया, बुद्धि तामाङ लगायतका कलाकारहरूको अभिनय रहेको छ । फिल्मले बजारमा अर्को ठूलो बजेटको फिल्मसँग प्रतिस्पर्धा गर्नुपरेकाले हल वितरकहरूले शो बाँडफाँडमा अन्याय गरेको आरोप टंक बुढाथोकीको छ ।