‘रमिताको पिरती’ माघ २३ गतेबाट रिलिज, आनाको जोडी धिरज कि समीर ?

इटहरी/ सुदिप्ता अधिकारीको निर्देशनमा बनेको नयाँ नेपाली फिल्म ‘रमिताको पिरती’ माघ २३ गतेदेखि देशभर प्रदर्शनमा आउने भएको छ । बुधबार ललितपुरमा आयोजित पत्रकार सम्मेलनमार्फत फिल्मको फस्टलुक पोष्टर सार्वजनिक गर्दै फिल्मको प्रदर्शन मिति घोषणा गरिएको हो । महिला प्रधान यो फिल्ममा आना शर्मा मुख्य भूमिकामा देखिनेछिन् ।

उनको साथमा धिरज मगर र विनय श्रेष्ठ रहेका छन् भने यसै फिल्ममार्फत लोकप्रिय गायक समीर श्रेष्ठ नायकका रूपमा डेब्यु गर्दैछन् । फिल्मको फस्टलुक पोस्टरमा आना शर्माका विभिन्न लुक्स देख्न सकिन्छ । उनी फिल्ममा ‘रमी’ नामकी पात्रको भूमिकामा छिन्, जसको वरिपरि कथावस्तु घुम्नेछ ।

फिल्ममा सुशान्त केसी, समीर श्रेष्ठ, महेश काफ्ले, अस्मिता अधिकारी र कुशल पोखरेलका गीत-संगीत रहेका छन् । छायांकन शिशिर विशांखे, सम्पादन सुनिल सिवाकोटी, कलर कपिल पराजुली र कोरियोग्राफी कातिक बरालले गरेका छन् । फिल्मका निर्माता सागर लम्साल, कार्यकारी निर्माता आना शर्मा र सन्तोष लम्साल हुन् भने आर.पी. प्रोडक्सन एसोसियट पनि निर्माता सहकार्यमा छ ।

वितरणको जिम्मा काठमाडौंमा रिच इन्टरटेन्मेन्ट र एप्पल इन्टरटेन्मेन्टले लिएका छन्, काठमाडौं बाहिर एफडी कम्पनीले वितरण गर्नेछ । कार्यक्रममा प्रमुख अतिथि चलचित्र विकास बोर्डका अध्यक्ष दिनेश डीसीले फिल्मले फरक कथा र दृष्टिकोण प्रस्तुत गर्ने विश्वास व्यक्त गर्दै शुभकामना दिएका थिए । नव–नायक समीर श्रेष्ठले आफू पहिले संगीतकारका रूपमा फिल्मसँग जोडिएको तर कथावस्तु मन परेपछि अभिनय गर्ने निर्णय गरेको बताए ।

@parikalanewsofficial

नायिका आना शर्माले भने यो कथा आफूले चार वर्षअघि सुनेको र त्यसबेलादेखि नै फिल्मप्रति आकर्षित भएको बताइन् । “अहिले मेरो जीवन नै ‘रमिताको पिरती’ वरिपरि घुमिरहेको छ,” उनले मुस्कुराउँदै भनिन् । अब सबैको उत्सुकता यही छ कि ‘रमी’ अर्थात् आना शर्माको पिरती अन्ततः धिरजसँग हो कि समीरसँग ? यसको जवाफ फिल्म रिलिजपछि मात्र खुल्नेछ ।