‘पाँच पाण्डव’को शुभमुहूर्त, प्रमुख भूमिकामा हरिवंश आचार्य, धुर्मुस, मुन्द्रे र बले

इटहरी/ ठूलो स्टारकास्ट र बलियो निर्माण टिमसहित नयाँ नेपाली फिल्म ‘पाँच पाण्डव’को मंगलबार काठमाडौंको गणेशथानमा भव्य शुभमुहूर्त गरिएको छ । सामाजिक कथामा आधारित यो फिल्मलाई वसन्त निरौलाले निर्देशन गर्नेछन् भने प्रमुख भूमिकामा हरिवंश आचार्य, सीताराम कट्टेल (धुर्मुस), जितु नेपाल (मुन्द्रे), सागर लम्साल (बले) लगायतका चर्चित कलाकारहरू देखिने भएका छन् ।

फिल्मको नामले धार्मिक कथा झल्काए पनि ‘पाँच पाण्डव’ धार्मिक नभई सामाजिक ड्रामा हुने निर्माण पक्षले स्पष्ट पारेको छ । यद्यपि, नाम र पात्रको प्रतीकात्मक सम्बन्धका कारण फिल्ममा महाभारतका पाण्डवहरूबाट प्रेरित कथा हुने अनुमान गरिएको छ ।

महिला पात्रका रूपमा दीपाश्री निरौला र जनी गुरुङ देखिनेछन् भने अन्य केही कलाकार फाइनल हुन बाँकी रहेको निर्देशक निरौलाले बताएका छन् । फिल्मको कथा, पटकथा र संवाद सुशील पौडेलले लेखेका हुन्, जो चर्चित फिल्म ‘प्रसाद’ का लेखक पनि हुन् । काली रानी फिल्म्सको ब्यानरमा निर्माण हुने फिल्ममा नवीन श्रेष्ठ प्रस्तुतकर्ता र काली रानी श्रेष्ठ निर्माता रहनेछन् ।

@parikalanewsofficial

उच्च बजेटमा निर्माण हुन लागेको यो फिल्मबारे प्रस्तुतकर्ता नवीन श्रेष्ठले भने, “हाम्रो कलाकार लाइनअप बलियो छ, त्यसैले हामी दर्शकको मन छुने, सम्झिरहने ऐतिहासिक चलचित्र बनाउन प्रतिबद्ध छौँ।” गतवर्ष ‘लाज शरणम्’ निर्माण गरेका नवीनको यो अर्को ठूलो प्रोजेक्ट हो । केही महिनाभित्र छायांकन सुरु हुने बताइएको छ भने दिलिप पन्त प्रोडक्सन म्यानेजरका रूपमा रहनेछन् ।