पारिवारिक भावनामा बनेको फिल्म ‘हर्ष’को नयाँ पोस्टर सार्वजनिक

इटहरी/ मानवीय सम्बन्ध र पारिवारिक भावनाको कथा बोल्ने फिल्म ‘हर्ष’ले आफ्नो नयाँ पोस्टर सार्वजनिक गरेको छ । आउँदो मंसिर १२ गतेबाट प्रदर्शनमा आउने यस फिल्मको शुक्रबार सार्वजनिक पोस्टरले दर्शकको ध्यान तानेको छ । पोस्टरमा खगेन्द्र लामिछाने, वर्षा राउत र बालकलाकार साइमन वादीलाई आत्मीय पारिवारिक मुद्रामा देखाइएको छ, जसले सन्तानप्रतिको माया, अभिभावकको लगाव र परिवारको स्नेहपूर्ण जीवनलाई केन्द्रमा राखेको संकेत गर्छ ।

डेब्यु निर्देशक एकता पौडेलद्वारा निर्देशित ‘हर्ष’ले पारिवारिक फिल्म मन पराउने दर्शकका लागि सन्देशपूर्ण कथा पस्कने तयारी गरेको छ । स्वर्गीय निर्देशक शिव रेग्मीकी भान्जी समेत रहेकी पौडेलले न्यूयोर्क फिल्म एकेडेमीमा फिल्म मेकिङ अध्ययन गरेकी हुन् । उनले यसअघि छोटा फिल्महरू निर्माण गरेकी थिइन् र ‘हर्ष’लाई आफ्नो पहिलो फिचर निर्देशनको रूपमा दर्शक रिझाउने तरिकाले पस्किने दाबी गरेकी छिन् ।

यो फिल्ममा खगेन्द्र, वर्षा र साइमनसँगै निर शाह, सन्तोष पन्त, शर्मिला मल्ल, माओत्से गुरुङ, विशाल पहाडी, निमा पाण्डे, लुनिभा तुलाधर, अंशु महर्जन, रेनु प्रधान, सुवर्ण थापा, श्रृष्टि महर्जन र सिर्जना नापितको पनि अभिनय रहेको छ । फिल्ममा आलोक शुक्लाको छायांकन, समीर रहिमाल, वसन्त सापकोटा र एलिश कार्कीको संगीत, लोकेश बज्राचार्यको सम्पादन तथा सुनिल क्षेत्री र निर्देशक पौडेलकै कोरियोग्राफी रहेको छ ।

@parikalanewsofficial

अष्टलक्ष्मी प्रोडक्सन्स् र ई–प्राइम मुभिजको ब्यानरमा निर्माण भएको ‘हर्ष’को कथा स्वयं निर्देशक पौडेलले लेखेकी हुन् । प्रशन्न पौडेल र विकास पौडेल निर्माता, हिक्मत चोखाल कार्यकारी निर्माता र इश्वर घिमिरे प्रोडक्सन म्यानेजर हुन् । फिल्म काफिया फिल्म्स र डिसिएनले वितरण गर्ने छन् भने डिजिटल पार्टनरमा बुढासुब्बा डिजिटल रहेको छ । फिल्मको ट्रेलर कार्तिक १८ गते (मंगलबार) सार्वजनिक हुनेछ र त्यसपछि प्रचार-प्रसारलाई थप तीव्र बनाउने तयारी गरिएको छ ।