भ्रष्टाचारविरुद्ध युवाको आवाज: ‘परिवर्तन’ फिल्मको दमदार टिजर सार्वजनिक

इटहरी/ देशमा व्याप्त भ्रष्टाचार, बेथिति, अन्याय र अत्याचारको विरुद्धमा युवा नेतृत्वको आह्वान गर्ने सन्देश बोकेको प्रतिक्षित फिल्म ‘परिवर्तन’को टिजर सार्वजनिक भएको छ । निर्माण पक्षले छठ पर्वको विशेष अवसर पारेर आगामी माघ ९ गते देखि प्रदर्शनमा आउन लागेको यस फिल्मको टिजर रिलिज गरेको हो । टिजरमा मुख्य अभिनेता सुशील श्रेष्ठलाई एक्सन अवतारमा देख्न सकिन्छ ।

निर्देशक विजय केरुङका अनुसार टिजरले फिल्मको मूल सन्देशलाई दर्शकमाझ पुर्‍याउने प्रयास गरेको छ । उनले यो फिल्मले ‘युवाको विद्रोही सोच, देशप्रतिको जिम्मेवारी र सुधारको चाहना’लाई सशक्त रूपमा प्रस्तुत गर्ने बताए । फिल्मका निर्माता तथा कथा लेखक दिपक शिवाकोटीले ‘परिवर्तन’ले देशभक्त युवाहरूको आवाजलाई ठूलो पर्दामा उतार्ने प्रयास गरेको बताए । हेर्नुस् टिजर ।

विजय केरुङको निर्देशनमा बनेको यस फिल्ममा सुशील श्रेष्ठसँगै अञ्जना बराईली, करिश्मा मानन्धर, बुद्धि तामाङ, सरोज खनाल, हेमन्त बुढाथोकी लगायत सुभाष मेचे, पुकार भट्टराई, शंकर श्रेष्ठ, गौतम तिवारी, यमनाथ खरेल, शिरु बिष्ट, आशा पौडेल, आयुषा कार्की जस्ता दिग्गज कलाकारहरूको अभिनय रहेको छ । फिल्मको लेखन शिवम अधिकारीले गरेका हुन् । यसमा एस.डी. योगीको संगीत, श्री श्रेष्ठको एक्सन निर्देशन, शिव ढकालको छायांकन र बन्दे प्रसादको सम्पादन रहेको छ । आर आर फिल्मस् ले वितरणको जिम्मा लिएको ‘परिवर्तन’को डिजिटल पार्टनर ओएसआर डिजिटल रहेको छ ।