‘सोल्टिनी’को शो कटौती: ‘गुटबन्दी’ र ‘अन्याय’ विरुद्ध अभिमन्यु निर्माताको आवाज

इटहरी/ अभिनेता प्रकाश सपुत अभिनित नेपाली फिल्म ‘सोल्टिनी’ले प्रदर्शनको केही दिनमै देशका अधिकांश फिल्म हलहरूमा न्यून शो पाएको र ती शोहरू समेत कटौती हुँदै गैरहेको घटनाले नेपालि फिल्म वृत्तमा ‘सिन्डिकेट’ को विषयलाई पुन: चर्चामा ल्याएको छ । कोशी प्रदेशको इटहरीमा फिल्म प्रदर्शनअघि प्रचारप्रसारको सिलसिलामा पुगेका अभिनेता सपुतले अन्य फिल्मसरह नै सोल्तिनिले शो पाउने अपेक्षा सहितको धारणा व्यक्त गरेका थिए । तर, रिलिजसँगै न्यून शो पाउनु र पाएको न्यून शो पनि रिलिजको दुई दिनमै कोशी प्रदेशका प्रमुख हल लगायत अन्य ठाउँका प्रमुख शहरका फिल्म हलबाट उतारिनुलाई अन्यायपूर्ण मानिएको छ ।

यस घटनापछि अलटाइम ब्लकबस्टर फिल्म ‘पूर्णबहादुरको सारङ्गी’का निर्माता तथा यहि कार्तिक २१ गते प्रदर्शनको तयारीमा रहेको फिल्म ‘अभिमन्यु च्याप्टर १’का निर्माताले सामाजिक सञ्जाल फेसबुकमार्फत असन्तुष्टि व्यक्त गरेका छन् । उनले ‘सोल्टिनी’ को शो घट्नु र आफ्नो फिल्म ‘अभिमन्यु च्याप्टर १’ लाई कार्तिक २१ गते ‘शो नै दिन मिल्दैन’ भन्नुलाई ‘अन्याय’ को संज्ञा दिएका छन् ।

उनले आफ्नो आक्रोश व्यक्त गर्दै सामाजिक संजालमा लेखेका छन्, “आखिर कहिलेसम्म यस्तो अन्याय । पूर्णबहादुरको सारङ्गीमा भएको एउटा डाइलग याद आयो: ‘मास्टर साबको भन्दा ठूलो राजनीति होला उता शहरमा’ !! गुटबन्दीको राजनीति, सिन्डिकेट र गुण्डागर्दी आखिर कहिलेसम्म ????” यो घटनाले नेपाली फिल्म क्षेत्रमा ‘शो’ वितरणमा हुने कथित ‘गुटबन्दी’, ‘सिन्डिकेट’ र ‘अन्याय’ को विषयलाई एकपटक फेरि उजागर गरेको छ । दर्शकहरूले राम्रो मानिएको फिल्मलाई समेत हेर्न नपाई हलबाट उतारिनुले फिल्मकर्मी र दर्शक दुवैमा आक्रोश बढेको देखिन्छ । यस विषयमा वितरक तथा हल सञ्चालकहरूको धारणा भने आउन बाँकी छ ।