फिल्म ‘हरिबहादुरको जुत्ता’का निर्माता सरोज नयाँ फिल्मको तयारीमा, २०८३ मा रिलिज गर्ने घोषणा

इटहरी/ फिल्म ‘हरिबहादुरको जुत्ता’का निर्माता सरोज ओलीले आफ्नो टिम नयाँ फिल्म निर्माणको तयारीमा जुटेको जानकारी दिएका छन् । उनले सामाजिक सञ्जालमार्फत आफ्नो र हरिबंश आचार्यको तस्विरसहित एक स्ट्याटस लेख्दै २०८३ सालमा पुन: हलमा भेट्ने घोषणा गरेका हुन् । तर उनले फिल्मको नाम, कलाकार लगायतका विषयमा भने केहि खुलाएका छैनन् । निर्माता ओलीले देशमा आन्दोलनले सृजना भएको प्रतिकुल परिस्थितिका बीचमा पनि पूर्वघोषित मिति असोज १३ (दशैँको फूलपाती) मा फिल्म ‘हरिबहादुरको जुत्ता’ रिलिज गरेको स्मरण गरेका छन् ।

रिलिज मिति पहिले नै घोषणा भइसकेको र माहोल सुधारउन्मुख भएकोले निर्धारित समयमै फिल्म प्रदर्शन गर्नुपरेको उनले उल्लेख गरेका छन् । ओलीका अनुसार, रिलिज भएदेखि नै फिल्म हल र दर्शकले ‘हरिबहादुरको जुत्ता’लाई राम्रो साथ दिएका छन् । प्रतिकुल मौसम र परिस्थितिको बीचमा पनि देशभरका हलमा दर्शकको उपस्थितिबाट टिम उत्साहित रहेको भन्दै उनले सबैलाई धन्यवाद ज्ञापन गरेका छन् ।

हाल फिल्म ‘हरिबहादुरको जुत्ता’ विदेशका केही स्थानमा प्रदर्शन भइरहेको र केही स्थानमा प्रदर्शनको तयारीमा रहेको पनि उनले जनाएका छन् । फिल्मको व्यापारिक सफलताको विषयमा जानकारी दिँदै निर्माता ओलीले लेखेका छन्, “बक्स अफिस व्यापार, विदेश प्रदर्शन, डिजिटल राइट्स र विज्ञापनमार्फत हामी हाम्रो लगानी सुरक्षित गर्न सफल भएका छौँ।” उनले आफ्नो पहिलो फिल्मलाई प्रत्यक्ष वा अप्रत्यक्ष रुपमा साथ दिने सम्पूर्ण कलाकार, प्राविधिक, वितरक, पत्रकार, चलचित्र हल तथा दर्शक सबैलाई धन्यवाद दिएका छन् ।