दर्शकको ध्यान खिच्यो ‘मन बिनाको धन’को टिजरले, ट्रेलर १२ गते सार्वजनिक हुने

इटहरी/ तिहारको भाइटिकाको दिनको अवसर पारेर सार्वजनिक भएको ‘मन बिनाको धन’ फिल्मको टिजरले यतिबेला दर्शकको ध्यान केन्द्रित गरिरहेको छ ।टिजरमा अशोक दर्जी नमज्जाले भक्कानिएका छन् । ति आँसुहरूले यो फिल्मको कथा कति गहिरो हुनसक्छ भन्ने संकेत गर्छन्, त्यसमाथि शिव परियार र प्रमोद खरेलको स्वरको मिठास झनै मन छुने छ । यहि कार्तिक २१ गतेबाट प्रदर्शनमा आउने यो फिल्मको ट्रेलर भने यहि आउने १२ गते सार्वजनिक गरिने निर्देशक टंक बुढाथोकीले जानकारी गराए ।

एक समय बाटोमै गीत गाएर गुजारा चलाउने अशोकलाई संगीतकार टंक बुढाथोकीले आफ्नै संरक्षणमा लिएपछि ‘मन बिनाको धन ठुलो कि धन बिनाको मन’ भन्ने वास्तविकता दर्शकले नजिकबाट देखिसकेका छन् । यतिबेला अशोक काठमाडौंमा कक्षा ९ मा अध्ययनरत छन्, र यही जीवनपथलाई स्पर्श गर्ने कहानी फिल्मले उठान गरेको छ ।

समाजका संवेदनशील पक्षहरूलाई उजागर गर्दै निर्माण गरिएको फिल्मले दर्शकलाई मन र धनको सही महत्वको पाठ सिकाउने निर्देशक बुढाथोकी बताउछन । यो फिल्मका कप्तान नै टंक बुढाथोकी हुन् । निर्माण, निर्देशनदेखि लेखनसम्मको कमान सम्हाल्दै उनले आफ्नो जीवनसँग गाँसिएको कथा पर्दामा उतारेका छन् । पटकथा र संवाद शिवम अधिकारीले तयार पारेका हुन् । हेर्नुस टिजर

मिनु शर्मा (सपना) मुख्य भूमिकामा देखिने फिल्ममा जीपी संगौला, विवेक नेपाल र विजय पाण्डे सहनिर्माता छन् । फिल्ममा अशोक दर्जीसँगै सरोज खनाल, सन्तोष पन्त, रमा थपलिया, नीता ढुंगाना, बुद्धि तामाङ, रवीन्द्र झा, पार्वती अधिकारी, उत्सव सापकोटा, शंकर श्रेष्ठ, साम्राज्ञी थापा, आर्यन पोखरेल, विजय डंगोल सहितका कलाकारको अभिनय रहेको छ ।

यो फिल्ममा टंक बुढाथोकीकै संगीत, सौरभ लामाको छायांकन, कविराज गहतराज र रामजी लामिछानेको कोरियोग्राफी, मित्र डी. गुरुङको सम्पादन र नवराज शर्माको मुख्य सहायक निर्देशनले फिल्मलाई मजबुत बनाएको छ । वितरणको जिम्मा एप्पल इन्टरटेन्मेन्ट, रीच इन्टरटेन्मेन्ट र एफडी कम्पनीले लिएको छ । फिल्म युनिट यतिबेला देशव्यापी आक्रामक प्रचारमा जुटिरहेको छ ।