फेसबुकमा यस्तो लेख्दै गायिका नितुले बाबुल गिरीको कार्यालयमा आत्मदाहको प्रयास

इटहरी/ चर्चित गायक बाबुल गिरीको अनामनगरस्थित कार्यालय अगाडि गायिका नीतु पौडेलले आत्मदाहको प्रयास गरेकी छन् । सामाजिक सञ्जाल फेसबुकमा ‘जीवनको सबैभन्दा ठूलो निर्णय’ लिने संकेत गर्दै स्टोरी पोष्ट गरेको केही समयमै उनले यस्तो कदम चालेकी हुन् ।

आगो लागिसकेको अवस्थामा प्रहरीले उनलाई तत्काल उद्धार गरी कीर्तिपुरस्थित जलन उपचार अस्पतालमा भर्ना गरेको छ । जिल्ला प्रहरी परिसर, काठमाडौँका प्रवक्ता एसपी पवन भट्टराईले घटनाको पुष्टि गर्दै गायिकाको अवस्था हालसम्म सामान्य रहेको जानकारी दिएका छन् ।

एसपी भट्टराईका अनुसार घटनाको कारण पत्ता लगाउन अनुसन्धान थालिएको छ र कसैको संलग्नता पाइएमा कानूनी कारवाही गरिनेछ ।

आत्मदाहको प्रयास गर्ने गायिकाको साथमा गायक बबुल गिरी पनि अस्पताल पुगेका छन् । घटना हुनुअघि गायिकाले फेसबुक स्टोरीमा “आज मैले जीवनको सबैभन्दा ठूलो निर्णय लिदैछु अब ” भनेर पोस्ट गरेकी थिइन् । उनको यही रहस्यमय पोष्ट र आत्मदाहको प्रयासले घटनालाई थप संवेदनशील बनाएको छ ।