‘परान’मा जोडिनुको एकमात्र कारण यसको कथा हो’ : अभिनेत्री अञ्जना बराइली

इटहरी/ गोल्छा समूह र प्रिज्मा समूहको संयुक्त लगानीमा र ‘बाइस्कोप सिनेमा प्रा.लि.’ ले निर्माण रहेको पारिवारिक ड्रामा फिल्म ‘परान’ कार्तिक २४ गते प्रदर्शनको तयारीमा छ । यो फिल्मले आफ्नो जीवनको अन्तिम क्षणसम्म पनि छोराको आँखाअगाडि रहन चाहने एक बुबाको भावनात्मक यात्रालाई प्रस्तुत गर्छ । यसको शीर्ष भूमिकामा नेपाली फिल्म उद्योगका वरिष्ठ कलाकार नीर शाह रहेका छन् ।

पछिल्लो समयकी व्यस्त अभिनेत्री अञ्जना बराइलको पनि यस फिल्ममा उपस्थितिले विशेष चर्चा पाएको छ । प्रायः मुख्य भूमिकामा मात्र काम गर्ने बराइलले ‘परान’ मा आफ्नो भूमिका सानो भए पनि यसको गहिरो विषयवस्तुका कारण जोडिएको बताइन् । उनले यो फिल्मलाई ‘खोजेर हेर्नैपर्ने’ सूचीमा राखेकी छिन् ।

“म यस फिल्ममा जोडिनुको एक मात्र कारण यसको कथा हो । यो फिल्म त्यो कोटीमा पर्छ, जुन म आफैँ पनि हलमा खोजेर हेर्छु,” अञ्जनाले भनिन् । कामको गुणस्तर राम्रो भएकोमा पूर्ण विश्वस्त देखिएकी उनले भनिन्, “डबिङकै क्रममा मैले यो फिल्म दशैंको पारिवारिक माहोलमा लगाउनुपर्छ भनेकी थिएँ, जबकि म यस्ता सुझाव खासै दिन्न ।”

उनका अनुसार दशैं र तिहार पारिवारिक चाडपर्व भएकाले, राम्रो पारिवारिक कथा हेर्न चाहने दर्शकका लागि ‘परान’ उपयुक्त हुने विश्वास उनलाई थियो । यद्यपि, निर्माण पक्षले चाडपर्व सकिएपछि यसलाई रिलिज गर्ने तयारी गरिरहेको छ ।
अञ्जनाको दाबी छ, ‘परान’ले सबै उमेर समूहका मानिसहरूको भावनालाई समेटेको छ र यसले दर्शकको मन जित्नेछ । फिल्ममा नीर शाहको भूमिका प्रमुख रहे पनि दर्शकले लामो समयसम्म याद गर्ने पात्र आफूले निर्वाह गरेको उनको भनाइ छ ।

@parikalanewsofficial

“फिल्ममा मेरो पात्र ‘रूपा’ एकदमै मिलनसार र यादगार छ,” आफ्नो भूमिकाबारे बताउँदै उनले भनिन्, “परिस्थितिले मलाई त्यसरी प्रस्तुत गरेको छ । नीर शाह ज्यूको पात्र त स्मरणीय हुने नै भयो, त्यसपछि मेरो पात्रलाई पनि दर्शकले सम्झनेछन् । पात्रको बलियोपनकै कारण म यसको प्रचारमा सक्रिय भएकी छु ।”

नव-निर्देशक दीपकप्रसाद आचार्य (काकु) ले निर्देशन गरेको यो फिल्म उनकै कथामा आधारित छ, जसको पटकथा र संवाद यम थापाले तयार पारेका हुन् । फिल्ममा नीर शाह र अञ्जना बराइलीका साथै महेश शाह, मदनकृष्ण श्रेष्ठ, पूजा चन्द, केकी अधिकारी, प्रवीण खतिवडा, बुद्धि तामाङ लगायत कलाकारहरूको प्रभावशाली अभिनय रहेको छ । रिलिज नजिकिए पनि फिल्मले दर्शकको माया पाउनेमा अञ्जना बराइल पूर्ण ढुक्क छिन् ।