फिल्म मैझारोको ट्रेलर रिलिज, धीरज र मिरुनाको प्रेमकथा मुख्य केन्द्रमा

इटहरी/ नेपाली प्रेमकथामा सांस्कृतिक र भावनात्मक गहिराइ भर्ने प्रयासका साथ निर्देशक विल्सन विक्रम राई (तक्मे बुढा) ले ल्याएका छन् नयाँ चलचित्र ‘मैझारो’। सोमबार सार्वजनिक गरिएको यसको ट्रेलरले प्रेम, समाज र पहिचानबीचको संघर्षलाई संवेदनशील रूपमा चित्रण गरेको छ । झन्डै चार मिनेट लामो ट्रेलरमा धीरज मगर र मिरुना मगरको प्रेमकथा मुख्य केन्द्रमा छ, जहाँ मिरुनाको समर्पित प्रेम धीरजको मौनतासँग जोडिन्छ ।

धीरजको मनमाथि परेको बाध्यता र दीया पुनको आकर्षणबीच प्रेम त्रिकोण रोचक रूपमा देखाइएको छ । लिम्बू समुदायको संस्कार, पोशाक र परिवेशको प्रयोगले कथामा सांस्कृतिक स्पर्श थपेको छ । ट्रेलरमा दयाहाङ राई र विल्सन विक्रम राईको उपस्थिति विशेष आकर्षण बनेको छ । पेशाले फौजी रहेका विल्सन गाउँ फर्किएपछि उत्पन्न हुने परिस्थितिले कथामा नयाँ मोड लिन्छ, जहाँ दयाहाङको अन्त्यतिरको आगमनले रहस्यमय मोड थपेको छ । हेर्नुस् ट्रेलर ।

इलामका प्राकृतिक दृश्य र सौरभ लामाको मनमोहक छायांकनले ट्रेलरलाई दृश्यात्मक रूपमा बलियो बनाएको छ । तक्मे प्रोडक्सनको ब्यानरमा निर्माण भएको यो फिल्ममा बुद्धि तामाङ, सुनिल थापा, पुस्कर गुरुङ, अभयराज बराल, माउत्से गुरुङ, कविता आले, रजनी गुरुङ, प्रेम सुब्बा र अनिल सुब्बाको अभिनय रहेको छ । निर्माता डिबी राई र सरिना लामा राई हुन् । प्रेम, संस्कार र जीवनबीचको द्वन्द्वलाई उकेल्ने ‘मैझारो’ आगामी कात्तिक ७ गतेदेखि देशव्यापी प्रदर्शनमा आउने तयारीमा छ ।