फिल्म ‘वरिष्ठ बलराम’को न्याउली बनैमा चर्चामा, युट्युवमा ५४ लाख बढी भ्युज

इटहरी/ प्रदर्शनको तयारीमा रहेको फिल्म ‘वरिष्ठ बलराम’को गीत न्याउली बनैमा रिलिज भएको छोटो समयमै लोकप्रिय बन्न सफल भएको छ । यो गीतको भिडियो युट्युवमा सार्वजनिक भएको दुई हप्तामा ५४ लाख भ्युज पार गर्दै यतिबेला चर्चामा छ । यसपालीको तिहारको भाइटीकाको शुभ अवसर पारेर आगामी कार्तिक ६ गते प्रदर्शनमा आउने वरिष्ठ बलराम फिल्मका लागि यो गीतले ठूलो सहयोग पुगेको छ ।

फिल्मको गीत र ट्रेलरले सामाजिक सञ्जालमा जबरजस्त चर्चा बटुल्दै बक्स अफिसमा बलियो सुरूवात गर्ने सङ्केत दिएको छ । सार्वजनिक न्याउली बनैमा गीतमा प्रशान्त शिवाकोटीको शब्द र सङ्गीत रहेको छ भने । यो गीतमा प्रशान्त र शान्तीश्री परियारको सुमधुर आवाज छ । भिडियोमा अभिनेता विजय बराल र अभिनेत्री समृद्धि अर्यालको रोमान्स र भावनात्मक केमेस्ट्रीले दर्शकको मन जितेको छ ।

विशेषगरी विजयको जीवन्त अभिनय र नृत्य शैलीको दर्शकहरूबाट भएको प्रशंसाले फिल्मप्रति अपेक्षाको ग्राफ ह्वात्तै बढाएको छ । गीतसँगै चार दिनअघि सार्वजनिक गरिएको ट्रेलरले पनि दर्शकबाट उत्तिकै उत्साहजनक प्रतिक्रिया पाएको छ । करिब १४ लाख भ्युज नाघिसकेको ट्रेलरमा अभिनेता दयाहाङ राईको फरक गेटअप र विजय बरालसँगको उनको टकराब मुख्य आकर्षण बनेको छ । हेर्नुस् भिडियो ।

दुवै स्थापित कलाकारको दमदार अभिनय र टकरावले दर्शकमा फिल्म हेर्ने कौतुकता अझै बढाएको छ । सकारात्मक प्रतिक्रिया र सामाजिक सञ्जालमा बढ्दो चर्चा हेर्दा, ‘वरिष्ठ बलराम’ ले बक्स अफिसमा राम्रो प्रदर्शन गर्ने अनुमान गरिएको छ । सुरेन्द्र पौडेलले निर्देशन गरेको यस फिल्ममा दयाहाङ राई, विजय बराल, समृद्धि अर्याल, पशुपति राई, माओत्से गुरुङ, भोलाराज सापकोटा, रामबाबु रेग्मी र प्रदीप कुमार चौधरी (पीके) लगायतका कलाकारहरूको अभिनय रहेको छ ।

वृषभ सिद्धी इन्टरटेनमेन्टको प्रस्तुतिमा आन्भी फिल्मसको सहकार्यमा निर्माण भएको यस फिल्मको कथा तथा सम्पादन निर्देशक पौडेल आफैँले गरेका हुन् भने पटकथा महेश दवाडीले लेखेका हुन् । आशिष एच तामाङ र श्रीराज कार्की निर्माता रहेको यस फिल्ममा प्रदीप जी धामी र पुस्कर बी घिमिरे कार्यकारी निर्माताका रूपमा छन् भने राम विष्ट लाइन प्रोड्युसर रहेका छन् । मनकृष्ण महर्जनले छायांकन, प्रशान्त शिवाकोटीले सङ्गीत, सम्राट बस्नेतले एक्सन निर्देशन र प्रदीप लामाले नृत्य निर्देशन गरेका छन् । फिल्मको वितरण काठमाडौं उपत्यकामा डीसीएन र उपत्यका बाहिर कुवेर सिने डिस्ट्रिब्युसनले गर्नेछन् ।