सामाजिक यथार्थ र प्रेमबीचको संघर्ष बोल्ने ‘सोल्टिनी’को ट्रेलर सार्वजनिक

इटहरी/ सामाजिक यथार्थ र प्रेमबीचको संघर्षलाई पर्दामा उतार्ने तयारीमा रहेको नेपाली फिल्म ‘सोल्टिनी’ ले सोमबार काठमाडौंमा ट्रेलर सार्वजनिक गरेको छ । ट्रेलर रिलिज समारोहमा निर्देशक अर्जुन सुवेदी, फिल्मका प्रमुख कलाकार प्रकाश सपुत र परीक्षा लिम्बुसँगै विल्सन विक्रम राई, रवीन्द्र झा, सुन्दर धिताल, सुजन खतिवडा र सबु गुरुङ लगायतको सहभागिता थियो ।

ट्रेलरले सामाजिक विभेद, समुदायबीचको असमानता र त्यसले जन्माउने प्रेमको सङ्घर्षपूर्ण यात्रालाई भावनात्मक रूपमा प्रस्तुत गरेको छ । फिल्ममा अन्तरजातीय प्रेमकथामार्फत जातीय पूर्वाग्रह र पारिवारिक बाधाहरूको चित्रण गरिएको छ । कथा मुख्यतः अभिनेत्री परीक्षा लिम्बु र अभिनेता प्रकाश सपुतको सम्बन्ध वरिपरि घुमेको देखिन्छ, जसले दर्शकलाई प्रेम र समाजबीचको द्वन्द्वमा डुबाउने संकेत गर्छ । हेर्नुस् ट्रेलर ।

‘सोल्टिनी’ को निर्देशन अर्जुन सुवेदीले गरेका हुन् भने कथा लेखनमा सुवेदी स्वयं र कुमार भट्टराईको सहकार्य रहेको छ । फिल्ममा प्रकाश सपुत, परीक्षा लिम्बु, सुन्दर धिताल, सबु गुरुङ, सुजन खतिवडा, विल्सन विक्रम राई, रवीन्द्र झा, प्रकाश घिमिरे, प्रेम सुब्बा र कविता आलेको पनि सशक्त अभिनय देख्न सकिन्छ ।

निर्देशक सुवेदीका अनुसार फिल्मले समाजमा अझै पनि बाक्लो रूपमा फैलिएको जातीय विभेद र अमानवीय सोचमाथि प्रश्न उठाउँदै प्रेम, समानता र मानवीयताको सन्देश दिन खोजेको छ । आउँदो तिहारको भाइटीका अर्थात् कार्तिक ६ गते देखि प्रदर्शनमा आउने ‘सोल्टिनी’लाई अहिले दर्शक र फिल्मकर्मी दुबैले निकै उत्सुकतापूर्वक पर्खिरहेका छन् ।