ईटहरी/ प्रतिक्षित नेपाली कथानक फिल्म ‘वरिष्ठ बलराम’ को आधिकारिक ट्रेलर सार्वजनिक भएको छ । ट्रेलरले फिल्मका दुई मुख्य पात्र दयाहाङ राई (‘वरिष्ठ’ को भूमिकामा) र विजय बराल (‘बलराम’ को भूमिकामा) बीचको शक्ति, ठेक्का र सामाजिक हैसियतको तीव्र संघर्ष लाई प्रस्तुत गरेको छ । फिल्मको कथावस्तु मुख्यतया खोलाको ढुंगा र बालुवा ठेक्का माथि आधारित छ ।
हाल खोलाका ठेकेदार रहेका र आफ्नो रवाफ चलाउँदै आएका दयाहाङको ‘एकमना खोला’ मा जब गरीबीबाट माथि उठ्न चाहने विजयले आँखा गाड्छन्, तब यी दुईबीचको नोकझोक र द्वन्द्व सुरु हुन्छ । ट्रेलरमा ‘वरिष्ठ’ (दयाहाङ) आफ्नो अगाडि-पछाडि केटाहरू लगाएर दबदबाका साथ हिँडेको देखिन्छन् । उनी आफ्नो हैकमलाई कसैगरी ओरालो लाग्न नदिने ढिट राख्छन् ।
अर्कोतर्फ, ‘बलराम’ (विजय) आफ्नो जात र कुल ठेगान नभएका कारण अरूबाट हेपिएको महसुस गर्छन् र आफ्नो चोला परिवर्तन गर्ने चाहना राख्छन् । उनले नवयौवना समृद्धि अर्यालसँग प्रेम सम्बन्ध गाँसेको दृश्य पनि ट्रेलरमा समावेश छ । ट्रेलरले एउटा पक्षले आफ्नो स्तर कायम राख्न खोज्ने र अर्को पक्षले स्तर उकास्न खोज्ने बीचको रोचक र जीवन्त द्वन्द्वलाई रोचक ढङ्गले उजागर गरेको छ । हेर्नुस् ट्रेलर ।
दयाहाङको ‘खोलामा रजगज’ र विजयको त्यसको ‘स्वाद आफू पनि लिन खोज्ने’ प्रयास फिल्मको केन्द्रीय बिन्दु रहने सङ्केत ट्रेलरले दिएको छ । सुरेन्द्र पौडेलले निर्देशन गरेको यो फिल्म आउँदो कात्तिक ६ गते भाइटीकाको अवसर पारेर रिलिज हुँदैछ । ‘वरिष्ठ बलराम’ मा दयाहाङ राई, विजय बराल, समृद्धि अर्याल, पशुपति राई, माओत्से गुरुङ, भोलाराज सापकोटा, रामबाबु रेग्मी, प्रदीप कुमार चौधरी (पीके) लगायतका कलाकारको अभिनय छ ।
@parikalanewsofficial
निर्देशक पौडेलकै कथा र सम्पादन रहेको फिल्मको पटकथा महेश दवाडीले लेखेका हुन् । वृषभ सिद्धी इन्टरटेनमेन्टको प्रस्तुतिमा आन्भी फिल्मसको सहकार्य रहेको फिल्ममा आशिष एच तामाङ र श्रीराज कार्की निर्माता छन् । कार्यकारी निर्मातामा प्रदीप जी धामी र पुस्कर बी घिमिरे तथा लाइन प्रोडुसरमा राम विष्ट रहेका छन् । मनकृष्ण महर्जनको छायांकन, प्रशान्त शिवाकोटीको संगीत, सम्राट बस्नेतको एक्सन निर्देशन र प्रदीप लामाको नृत्य निर्देशन रहेको फिल्मलाई काठमाडौं उपत्यकामा डीसीएन र उपत्यका बाहिर कुवेर सिने डिस्ट्रिव्युसनले वितरण गर्नेछ ।
Discussion about this post