रातिको १०:५५ को बलिदान शो भरिभराउ, भोलिका शो घटाइएकोमा वितरकको आपत्ति

इटहरी/ दशैंको चहलपहल सकिएसँगै नेपाली फिल्म बजार फेरि तात्न थालेको छ । जेनजी आन्दोलनले स्तब्ध बनेको नेपाल पुनः बाढी-पहिरोको विषम परिस्थितिका बीच सामान्य अवस्था बन्दै गएपछि देशभरका फिल्म हलहरूमा दर्शकहरूको भीड बढ्दो क्रममा छ । दर्शकमा नयाँ फिल्म हेर्ने उत्साह उच्च रहँदा पनि फिल्म ‘बलिदान’ लाई भने अपेक्षित शो नदिँदा त्यसका वितरकहरू असन्तुष्ट बनेका छन् । सुरुका दिनमा अन्य फिल्मभन्दा उच्च शो पाएको बलिदान पछिल्ला दिनहरूमा दिनप्रतिदिन शो घट्दै गइरहेको छ ।

यसका वितरक कम्पनी कुबेर सिने डिस्ट्रीब्युटर्सका संचालक पुष्कर घिमिरेका अनुसार, फिल्मले राम्रो व्यापार गरिरहेको भए पनि हलहरूमा शो कटौती गरिएको छ । ‘आज मंगलबारको शोहरूमा दर्शकको उल्लेखनीय उपस्थिति थियो, कतिपय शोहरुमा त सिट नै भरिएका थिए,’ घिमिरेले भने, ‘तर यस्तो अवस्थामा पनि भोलि बुधबारका शोहरू घटाइएको छ, जुन अत्यन्तै अन्यायपूर्ण र निराशाजनक छ ।’

उनका अनुसार, फिल्मले काठमाडौं उपत्यकादेखि बलिदान लागेका सबै प्रदेशका सहरहरूमा उत्साहजनक व्यापार गरिरहेको छ । ‘दर्शकले फिल्मलाई माया गरिरहेका छन्, तर हलहरूले समर्थन नगरेको जस्तो महसुस भइरहेको छ,’ उनले बताए । घिमिरेले थपे, ‘आज अधिकांश शोहरूमा राम्रो भीड देखियो, यहाँसम्म कि राति १०:५५ को शो पनि ‘हाउसफुल’ नजिक छ । तर, यस्तो सकारात्मक संकेत हुँदाहुँदै पनि भोलिको शो घटाइएको छ । यसरी हेर्दा ‘बलिदान’लाई सम्पूर्ण फिल्म इन्डस्ट्रीले बाईकट गरेको अनुभूति हुन्छ ।”

@parikalanewsofficial

फिल्म ‘बलिदान’ अहिले देशभरका थुप्रै हलहरूमा प्रदर्शनमा रहेको छ र समीक्षकदेखि दर्शकसम्मबाट सकारात्मक प्रतिक्रिया पाइरहेको छ । सामाजिक सञ्जालमा पनि दर्शकहरूले फिल्मको कथावस्तु, अभिनय र निर्माणस्तरको प्रशंसा गरिरहेका छन् । तर, शो घटाइने निर्णयपछि दर्शक र वितरक दुवैको असन्तुष्टि बढेको छ । नेपाली फिल्म उद्योगमा चलिरहेको वितरण प्रणाली र हल-संघको प्रभावबारे फेरि एकपटक बहस सुरू भएको देखिन्छ । यदि यस्तो अवस्था निरन्तर रह्यो भने, ‘बलिदान’ जस्तो उत्कृष्ट प्रतिक्रिया पाइरहेको फिल्म पनि अपेक्षित व्यापारिक सफलता हासिल गर्न नसक्ने वितरकको भनाइ छ ।