इटहरी/ नेपाली फिल्म ‘बलिदान’ले केवल दर्शकलाई मात्र हैन, नेपाली फिल्म उद्योगका वरिष्ठ कलाकारहरूलाई समेत प्रभावित पारिरहेको छ । त्यही प्रभाव अनुभव गरेका हुन् वरिष्ठ अभिनेता तथा क्याप्टेन विजय लामाले । सोमबार साँझ फिल्म हेरेपछि उनले सञ्चारकर्मीहरूसँग कुरा गर्दै ‘बलिदान’ लाई “फरक स्तरको नेपाली फिल्म” भन्दै खुलेर प्रशंसा गरे । लामाले भने, “बलिदानमा मैले ठुलो बलिदानै पाएँ । यसमा सबैको मेहनत देखिन्छ । नेपाली फिल्मको स्तर बढ्दै गएको प्रमाण यही फिल्म हो ।”
उनले थपे, “हामीले अभिनय गर्दा देखेको सपना अहिलेका सन्तोष सेनहरूले साकार पार्दैछन् । ‘बलिदान’ हेर्दा नेपाली फिल्म अन्तर्राष्ट्रिय स्तरमा पुग्ने सम्भावना झनै स्पष्ट देखिन्छ ।” निर्देशक सन्तोष सेनको कामको विशेष प्रशंसा गर्दै लामाले हास्यपूर्वक भने, “मेरो समयमा सन्तोष सेन आइदिएका भए म पनि समीर भट्टजस्तै एक्सन हिरो हुन्थेँ होला ।”
त्यसैगरी, अभिनेता समीर भट्टको अभिनयको उच्च मूल्यांकन गर्दै लामाले समीर र उनका पिता बिराज भट्ट दुवैलाई आफ्ना-आफ्नै समयमा नेपाली फिल्मका स्तम्भका रूपमा व्याख्या गरे । “बिराज बिराज नै हुन्, समीर समीर नै हो । बिराजको समयमा बिराजको अधिपत्य थियो, अब समीरको पालो आएको छ,” उनले भने ।
फिल्मकी अभिनेत्री ऋचा शर्माले पनि दर्शकको माया पाउँदा आफू अत्यन्त भावविह्वल भएको बताइन् । समीरकी आमाको भूमिकामा देखिएकी उनले भनिन्, “मेरो भूमिकासँग धेरै आमाहरू भावनात्मक रूपमा जोडिनुभयो, त्यो मेरो लागि सबैभन्दा ठूलो पुरस्कार हो ।” बडादसैँको फूलपातीका दिनदेखि प्रदर्शनमा आएको ‘बलिदान’ हाल दोस्रो सातामा पनि देशभर करिब १ सय ३० शोका साथ उत्कृष्ट व्यापार गरिरहेको छ । वितरकहरूका अनुसार, फिल्मले पहिलो सातामै उल्लेखनीय सफलता हात पारेको छ ।
@parikalanewsofficial
आमा-छोराबीचको प्रेम, त्याग र सम्बन्धमा आधारित कथासँगै दमदार एक्सन र भावनात्मक अभिनयले दर्शकको हृदय छोएको ‘बलिदान’ लाई पछिल्लो पुस्ताका एक्सन स्टार समीर भट्टको करियरमा नयाँ मोडका रूपमा हेरिएको छ । आशुसेन फिल्म प्रोडक्सनको ब्यानरमा बनेको यस फिल्ममा समीर भट्टसँगै सौगात मल्ल, अर्पण थापा, ऋचा शर्मा, कविता राय, हेमन्त बुढाथोकी र प्रेम पुरीलगायत कलाकारको दमदार अभिनय देख्न सकिन्छ । फिल्मका निर्माता पवन ब्राडफोर्ड बिस्ट र कार्यकारी निर्माता प्रेम पुरी हुन् ।
Discussion about this post