‘मिसेस पुर्बेली आईकन’ प्रतिष्पर्धी सीताको रुढीवादी सोच परिवर्तनको आह्वान

इटहरी/ विवाहित महिलाहरूको सौन्दर्य र बौद्धिक क्षमता प्रदर्शन गर्ने प्रतियोगिता ‘मिसेस पुर्बेली आईकन’ दोस्रो संस्करण अब ग्राण्ड फिनालेको तयारीमा जुटेको छ । यस प्रतियोगिताकी फाइनल प्रतिस्पर्धी सिता पुरीले समाजमा महिलाप्रति रहेका गलत र रुढीवादी दृष्टिकोणलाई परिवर्तन गर्नुपर्ने आवश्यकतामा जोड दिएकी छिन् ।

इटहरीकी प्रतिस्पर्धी पुरीले आफ्नो धारणा राख्दै समाजमा अझै पनि महिनावारीलाई लाजको रूपमा हेरिने गलत सोच हावी रहेकोमा चिन्ता व्यक्त गरेकी छिन् । उनले यस्तो संकीर्ण सोचलाई सच्याउनुपर्ने आफ्नो चाहना रहेको बताइन् । उनका अनुसार विवाहअघि महिलाहरूको कर्तव्य ‘छोरी’ को रूपमा सीमित हुने भएपनि विवाहपश्चात् ‘बुहारी’ बनेपछि जिम्मेवारीहरू थपिने गर्छ ।

साथै, उनले पुरुषसरह समान काम गर्ने महिलाले थोरै पारिश्रमिक पाउने अवस्थाप्रति पनि चिन्ता व्यक्त गर्दै यस्तो विभेदका विरुद्ध सबैले आवाज उठाउनुपर्ने धारणा राखेकी छिन् । समाज र परिवारको महत्त्वलाई जोड दिँदै, “समाज भएर परिवार छ अनि परिवार भएर म छु।” पुरीले भनिन् ।

‘मिसेस पुर्बेली आईकन’ प्रतियोगिताले महिला सशक्तिकरणलाई सौन्दर्यसँग जोड्ने मुख्य उद्देश्य राखेको छ । प्रतियोगिताको सम्पूर्ण तयारी सम्पन्न भइसकेको र अब यही असोज २५ गते शनिबार साँझ इटहरीमै ग्राण्ड फिनाले मात्र बाँकी रहेको आयोजकले जनाएको छ । आयोजक संस्था ओपन स्पेस प्रालिका सञ्चालक सरोज श्रेष्ठले नेपालमा केही समयदेखि आइपरेको समस्याका कारण प्रतियोगिता सम्पन्न गर्न निकै कठिनाइ भइरहेको बताएका छन् ।

@parikalanewsofficial

यस संस्करणमा ११ जना प्रतिस्पर्धीहरूले फाइनलको यात्रा तय गरेका छन् । कविना पोख्रेल (रामधुनी), सृजना लिम्बू (मोरङ), सीमा लकान्द्री (इटहरी), अर्चना सिटौला (रंगेली मोरङ), समिता राई (इटहरी), परिना राई (खोटाङ), रईसा चौधरी (दुहवी सुनसरी), सिता पुरी (इटहरी), मेघा खड्का (इटहरी), अनुशा कुँवर (इटहरी), उर्मिला मगर (इटहरी) ले २ चरणको डिजिटल र फिजिकल अडिसन पार गरेर फाइनल प्रतिष्पर्धामा पुगेका हुन् ।

प्रतिस्पर्धीहरूलाई कोरियोग्राफर शुभेक्षा कार्कीले र्‍याम्प वाक, बोल्ने कला, महिला सशक्तिकरणसम्बन्धी ज्ञान लगायत विभिन्न बौद्धिक सिपमा प्रशिक्षण दिइरहेकी छिन् । केही साताअघि सम्पन्न ट्यालेन्ट राउन्ड मा प्रतिस्पर्धी पुरीले नृत्य प्रस्तुत गरेर आफ्नो प्रस्तुतिबाट सबैको ध्यान खिचेकी थिइन् । यो प्रतिष्पर्धाको विजेताले १ लाख रुपैयाँ बराबरको पुरस्कार सहित अन्य आकर्षक उपहारहरू प्राप्त गर्नेछन् । यस प्रतियोगिताको पहिलो संस्करण गत वर्ष सफलतापूर्वक सम्पन्न भइसकेको छ ।