महिलाले सीप र क्षमता घरबाहिर पनि प्रयोग गर्नुपर्छ: मिसेस पुर्बेली आईकन प्रतिष्पर्धी आयुषा कुँवर

इटहरी/ कोशी प्रदेशका विवाहित महिलाहरूलाई आत्मविश्वास, सौन्दर्य र सशक्तिकरणको एउटै मञ्चमा ल्याउने उद्देश्यसहित सुरु गरिएको ‘मिसेस पुर्बेली आइकन’ दोस्रो संस्करण अहिले फाइनल चरणमा पुगेको छ । सोही फाइनलका प्रतिस्पर्धीमध्येकी एक आयुषा कुँवरले महिलाहरूले घरभित्रको जिम्मेवारीसँगै समाजिक भूमिकामा पनि अग्रसर हुनुपर्ने धारणा राखेकी छन् ।

उनले भनिन्, “हामी सबैभन्दा पहिले महिला हौं, त्यसपछि विवाहित महिला । सानैदेखि हामीले धेरै कुरा सिकिरहेका हुन्छौं, त्यसैले आफ्नो सीप र क्षमता घरबाहिर पनि प्रयोग गर्नुपर्छ ।” समाजसेवामा सक्रिय कुँवरले आगामी दिनमा पनि यही क्षेत्रमा निरन्तर योगदान दिने प्रतिबद्धता जनाएकी छन् । उनले केही साताअघि सम्पन्न ट्यालेन्ट राउन्डमा खानाको परिकार बनाउने ट्यालेन्ट प्रस्तुत गरेकी थिइन् ।

आयोजक संस्था ओपन स्पेस प्रालिका सञ्चालक सरोज श्रेष्ठका अनुसार, देशको पछिल्लो परिस्थितिका कारण प्रतियोगिता सम्पन्न गर्न केही चुनौतीहरू रहे पनि अन्तिम तयारी पूरा भइसकेको छ । प्रतियोगिताको फाइनलमा रामधुनीकी कविना पोख्रेल, मोरङकी सृजना लिम्बू, इटहरीकी सीमा लकान्द्री, रंगेलीकी अर्चना सिटौला, समिता राई, खोटाङकी परिना राई, दुहवीकी रईसा चौधरी, इटहरीकी सिता पूरी, मेघा खड्का, अनुशा कुँवर र उर्मिला मगर गरी ११ जना प्रतिस्पर्धी रहेका छन् ।

यी सबैले डिजिटल र फिजिकल अडिसनका दुई चरण पार गर्दै फाइनलसम्मको यात्रा तय गरेका हुन् । उनीहरूलाई र्‍याम्प वाक, बोल्ने कला, नेतृत्व सीप र महिला सशक्तिकरणसम्बन्धी प्रशिक्षण दिइएको छ । प्रतियोगिताको कोरियोग्राफी शुभेक्षा कार्कीले गरिरहेकी छन् ।

@parikalanewsofficial

‘मिसेस पुर्बेली आइकन’ विवाहित महिलाहरूको लागि आयोजना गरिएको सौन्दर्य प्रतियोगिता हो, जसले केवल रूप र शैली नभई आत्मविश्वास र सशक्तिकरणलाई पनि केन्द्रमा राख्छ । गत वर्ष पहिलो संस्करण सफलतापूर्वक सम्पन्न भइसकेको यो प्रतियोगिताको दोस्रो संस्करणको ग्राण्ड फिनाले यही असोज २५ गते शनिबार साँझ इटहरीमा हुने आयोजकले जनाएको छ । विजेताले १ लाख रुपैयाँ बराबरको नगद पुरस्कारसहित विभिन्न आकर्षक उपहारहरू प्राप्त गर्नेछिन् ।