गायक दुर्गेश थापाले घाइते जेनजीहरुलाई भेटे, गरे १०/१० हजार नगद सहयोग

इटहरी/ लोकप्रिय गायक दुर्गेश थापा हालै अस्पताल पुगेका छन्, जहाँ उनले जेनजी आन्दोलनका घाइते युवाहरूलाई भेट गरी सान्त्वना दिएका छन् । घाइते युवाहरूको दृढता र देशप्रेम देखेर आफू अत्यन्त भावुक बनेको उनले सामाजिक सञ्जालमा लेखेका छन् । फेसबुकमार्फत थापाले, “दुख र कष्टले भरिएको जीवनमा पनि देशका लागि ज्यान अर्पण गर्न तयार युवाहरूलाई देख्दा आँखामा आँसु आयो, तर गर्व पनि लाग्यो।” भनेर लेखेका छन् ।

आन्दोलनका वेला थापा बेलायतको म्युजिकल टुरमा रहेका थिए । तर, आन्दोलनका क्रममा भएका घटनाले आफू निरन्तर पीडामा रहेको उल्लेख गर्दै उनले केही कार्यक्रम स्थगित गरेको जानकारी दिएका छन् । उनका अनुसार, अहिले देश सहि बाटोमा हिँड्न थालेको श्रेय जेनजी आन्दोलनको साहस र बलिदानलाई जान्छ ।

थापाले बिरामीलाई भेटेर मात्र फर्किएनन, अस्पतालमा रहेका ११ जना घाइते युवालाई प्रतिव्यक्ति १० हजार रुपैयाँका दरले सहयोग समेत गरेका छन् । उनले क्रमशः सबै घाइते र प्रभावित परिवारहरूमा पुग्ने र सकेसम्म सहयोग गर्ने प्रतिबद्धता पनि जनाएका छन् ।

@parikalanewsofficial

“म कलाकार भए पनि सर्वप्रथम यो देशको नागरिक हुँ। दर्शक र भगवानको माया र आशीर्वादले आज म यहाँसम्म आइपुगेको हुँ, त्यसैले आफ्नो कमाइको केही हिस्सा यी वीर युवाहरूको सेवामा अर्पण गरेको छु।” थापाले लेखेका छन् । उनले देश र युवाहरूको बलिदान व्यर्थ नजाओस् भन्ने कामना गर्दै “यो बलिदान कहिल्यै व्यर्थ नजाओस्, देश सदैव जनताको चाहना अनुसार गौरवशाली बनोस् । म सधैं जेनजीको पक्षमा छु । नेपालको जय होस्।” भनेका छन् ।