‘माइतीघर’मा धीरज मगर प्रहरीदेखी लाहुरेसम्म, आखिर कस्तो हो उनको चरित्र ?

इटहरी/ नेपाली फिल्मप्रेमीका लागि यसपालीको दशैंमा विशेष पारिवारिक फिल्म ‘माइतीघर’ले रौनक छर्ने देखिएको छ । दशैँको फूलपाती अर्थात असोज १३ गते रिलिज हुने यस फिल्मको अग्रिम बुकिङ सुरु भएसँगै दर्शकमाझ उत्साह चुलिएको छ । गीत र ट्रेलरले नै राम्रो प्रतिक्रिया पाइरहेका कारण ओपनिङ दिनमै दर्शकको राम्रो चाप देखिने अपेक्षा गरिएको छ ।

मुख्य भूमिकामा रहेका धिरज मगर यसपटक फरक गेटअप र ग्रे सेड पात्रमा देखिँदैछन् । कहिले प्रहरी, कहिले विदेशी लाहुरेको भेषमा प्रस्तुत हुने उनको चरित्रले दर्शकमाझ रहस्य र कौतुहलता जगाउने विश्वास उनको छ । धिरज भन्छन्– “तामाङ संस्कृतिको परिवेशमा आधारित कथा र माइतीघर–चेलीबीचको भावनात्मक सम्बन्ध नै मलाई यस फिल्मतर्फ आकर्षित गर्ने मुख्य कारण हो ।”

फिल्मले हाँस्दै रुने क्षण दिने दाबी उनले गरेका छन् । रोहित अधिकारीको निर्माण र मिलन तामाङको निर्देशनमा बनेको यस पारिवारिक ड्रामा फिल्ममा धिरजसँगै केदार प्रसाद घिमिरे, प्रकाश सपुत, उपासना सिंह ठकुरी, श्यामाश्री शेर्पा, युवराज लामा, वुद्दि तामाङ लगायतका कलाकारको दमदार अभिनय समावेश छ । यसरी कलाकारको जोश, कथावस्तुको नवीनता र सांस्कृतिक प्रस्तुतिले गर्दा ‘माइतीघर’ ले दशैंलाई अझ रमाइलो र अविस्मरणीय बनाउने अपेक्षा गरिएको छ ।