‘पेन्सनपट्टा’मा गुरुङ फिल्मका चर्चित कलाकार विश्वास गुरुङ र माया गुरुङ अनुबन्ध

इटहरी/ माओत्से गुरुङको निर्देशनमा बन्ने उनको दोस्रो फिल्म ‘पेन्सनपट्टा’को लागि कलाकार हरु अनुबन्ध गर्ने कार्य थालनी भएको छ । कार्तिकबाट फ्लोरमा निस्कन लागेको यस फिल्ममा यसअघि नै अनुबन्धित दयाहाङ राईसँगै गुरुङ फिल्मका चर्चित कलाकार विश्वास गुरुङ र माया गुरुङ पनि मुख्य भूमिकामा देखिने भएका छन् ।

‘जुनी जुनी’, ‘तिमी नभए’, ‘म्हो’, ‘कुटुम्बेरी साइनो’, ‘फिच्यो’ र ‘सिरसुवा’मा अभिनय गरेर परिचित भएका विश्वास र ‘ह्युल’, ‘च्यागी’ र ‘घलेक’मा देखिएकी माया दुवै जना पहिलोपटक नेपाली भाषाको फिल्ममा प्रवेश गर्दैछन् । गुरुङ फिल्मबाट अभिनय यात्रा सुरु गरेका यी दुईले माओत्से गुरुङलाई आफ्नो ‘गडफादर’ मान्दै मेन स्ट्रिम फिल्ममा डेब्यु पाउँदा झन् उत्साहित भएको बताएका छन् ।

फिल्मको कथा नामअनुसार भूतपूर्व लाहुरेको जीवनसँग जोडिएको जस्तो लागे पनि वास्तवमा लोभी युवक कसरी दानी बन्छ भन्ने कथावस्तुमा आधारित रहेको निर्देशक तथा निर्माता गुरुङले बताएका छन् । माओत्से गुरुङ फिल्मस्को ब्यानरमा बन्ने यो फिल्मको कथा स्वयं निर्देशक गुरुङकै लेखन हो । यसको सम्पूर्ण छायांकन कास्कीको पोखरा आसपासमा हुनेछ भने छायांकन सुशन प्रजापति गर्नेछन् ।

@parikalanewsofficial

फिल्मको कास्टिङ निर्देशक सुरज तमु र प्रोडक्सन म्यानेजर डिबी गुरुङ रहेको टिमले अन्य कलाकार चाँडै सार्वजनिक गर्ने जनाएको छ । पहिलो निर्देशनमै बक्सअफिस हिट दिएका माओत्से गुरुङ पछिल्लो समय गुरुङ भाषाका फिल्ममार्फत निर्देशनमा सक्रिय हुँदै आएका छन् । कलाकार, लेखक र निर्माता समेत बनेका उनले ‘पेन्सनपट्टा’लाई आफ्नो अर्को फरक प्रस्तुति हुने विश्वास व्यक्त गरेका छन् ।