फिल्म ‘वरिष्ठ बलराम’को नयाँ गीत ‘न्याउली बनैमा’ सार्वजनिक

इटहरी/ फिल्म ‘वरिष्ठ बलराम’को नयाँ गीत ‘न्याउली बनैमा’ सार्वजनिक भएको छ । आउँदो कात्तिक ६ गते भाइटीकाको अवसरमा प्रदर्शन हुने फिल्मले रिलिजअघि नै दर्शकलाई गीतको माध्यमबाट आकर्षित गर्ने प्रयास गरेको छ । यस गीतमा प्रेमी र प्रेमिकाको बीचको मीठो सम्बन्ध र शंकालाई रोचक ढंगले प्रस्तुत गरिएको छ ।

गीतमा प्रेमीले प्रेमिकालाई सँगै जीवन बिताउने सपना देखाएका छन्, तर प्रेमिकाले भने उनको बानी-व्यहोराप्रति शंका व्यक्त गर्छिन् । प्रेमीले शंका नगर्न गरेको आग्रहपछि प्रेमिका सहमत हुन्छिन् । गीतमा प्रशान्त शिवाकोटीको शब्द र संगीत रहेको छ भने स्वरमा प्रशान्तलाई शान्तिश्री परियारले साथ दिएकी छन् ।

यस गीतको भिडियोमा फिल्मका मुख्य कलाकार विजय बराल र समृद्धि अर्यालको अभिनय देख्न सकिन्छ । भिडियोमा उनीहरूको केमिस्ट्री निकै आकर्षक देखिएको छ, जसले फिल्ममा उनीहरू मुख्य जोडी रहेको संकेत गर्छ ।
सामाजिक कथावस्तुमा आधारित यो फिल्मलाई सुरेन्द्र पौडेलले निर्देशन गरेका हुन् । यसमा दयाहाङ राई, विजय बराल, समृद्धि अर्याल, पशुपति राई, माओत्से गुरुङ, भोलाराज सापकोटा लगायतका कलाकारको अभिनय रहेको छ । हेर्नुस् भिडियो ।

निर्देशक पौडेलकै कथा र सम्पादन रहेको फिल्मको पटकथा महेश दवाडीले लेखेका हुन् । वृषभ सिद्धी इन्टरटेनमेन्ट र आन्भी फिल्मसको सहकार्यमा बनेको यो फिल्मलाई आशिष एच तामाङ र श्रीराज कार्कीले निर्माण गरेका हुन् । चितवनका विभिन्न स्थानमा छायांकन गरिएको यो फिल्मको छायांकन मनकृष्ण महर्जनले गरेका हुन् । यो फिल्मलाई काठमाडौँ उपत्यकामा डीसीएन र उपत्यका बाहिर कुबेर सिने डिस्ट्रिब्युसनले वितरण गर्नेछ ।

@parikalanewsofficial