४६ वर्षपछि कालजयी गीत ‘सिन्धुली गढी घुमेर हेर्दा’ रिमेक

इटहरी/ नेपाली संगीतको इतिहासमा अमिट छाप छोडेको कालजयी गीत ‘सिन्धुली गढी घुमेर हेर्दा’ फेरि नयाँ रूपमा सार्वजनिक भएको छ । स्वर्गीय कृष्ण विक्रम थापाले शब्द, संगीत र स्वर दिएका यस गीतलाई उनका जेठा छोरा राजु थापाले पुनर्जीवित गरेका हुन् । थापाको जीवनकालमै यो गीत नेपालीको जिव्रोमा झुन्डिने स्तरसम्म लोकप्रिय बनेको थियो ।

२०३६ सालमा रेडियो नेपालमा रेकर्ड भई प्रथम पुरस्कार जित्न सफल यो गीतलाई ४६ वर्षपछि नयाँ पुस्तासामु रिमेकमार्फत प्रस्तुत गरिएको हो । रि-एरेन्ज रुविन कुमार श्रेष्ठले गरेका छन् । सिन्धुलीको ऐतिहासिक गढी र सांगीतिक धरोहरलाई उजागर गर्ने उद्देश्यसहित निर्माण गरिएको नयाँ संस्करणको भिडियो पनि त्यहीँ जिल्लाका रमणीय स्थलमै छायांकन गरिएको छ । हेर्नुस भिडियो

भिडियोमा रमेश विश्वकर्मा र दीप्सा कार्कीले मुख्य अभिनय गरेका छन् भने पवन केसी, सत्य देवी, पवित्रा रम्तेल र काजी थापा पनि भिडियोमा देखिएका छन् ।क्रान्ति केसी निर्देशित भिडियोको सिनेमेटोग्राफी बासु बरालले गरेका छन् । ‘सिन्धुली गढी घुमेर हेर्दा सुन्तलीमई’को यो रिमेक म्युजिक नेपालको युट्युब च्यानलमार्फत सार्वजनिक भएको छ । चार दशकभन्दा लामो अन्तरालपछि आएको यस पुनर्जागरणले नयाँ पुस्तालाई पनि सिन्धुलीको सांगीतिक धरोहरसँग जोड्ने अपेक्षा राखिएको छ ।