फिल्म ‘मैझारो’को टिजर सार्वजनिक, भावनात्मक प्रेमकथाको झल्को

इटहरी/ नेपाली फिल्म ‘मैझारो’को टिजर सार्वजनिक भएको छ । निर्माण पक्षले बडादशैंको घटस्थापनाको अवसर पारेर सोमबार रिलिज गरेको १ मिनेट ५८ सेकेण्डको यो टिजरले दर्शकहरूलाई फरक किसिमको कथावस्तु प्रस्तुत गरेको छ ।
टिजरमा अभिनेता धिरज मगर, मिरुना मगर र दिया पुन बीचको त्रिकोणात्मक प्रेमकथालाई सुन्दर ढंगले देखाइएको छ ।

इलामका मनमोहक चिया बगान र ग्रामीण परिवेशले यसलाई अझै आकर्षक बनाएको छ । मिरुनालाई चिया बगानमा डोको बोकेर काम गरेको र धिरजसँग प्रेममा भएको देखाइएको छ । तर कथामा अप्रत्याशित मोड आउँछ जब धिरजको जीवनमा दिया पुनको प्रवेश हुन्छ ।

निर्देशक विल्सन विक्रम राई (तक्मेबुढा), जो हास्यप्रधान भूमिकाका लागि परिचित छन्, उनले यस फिल्मबाट आफ्नो छवि बदल्ने संकेत दिएका छन् । टिजरले फिल्म कमेडी नभएर मौलिक किराती परिवेशमा आधारित भावनात्मक प्रेमकथा हो भन्ने स्पष्ट पारेको छ । यो फिल्मले निर्देशकको नयाँ पहिचान निर्माण गर्ने अपेक्षा गरिएको छ । हेर्नुस् टिजर ।

फिल्ममा धिरज, मिरुना र दियासँगै दयाहाङ राई, बुद्धि तामाङ, सुनिल थापा, पुस्कर गुरुङ लगायतका कलाकारहरूको अभिनय रहेको छ । ‘तक्मे प्रोडक्सन’को ब्यानरमा बनेको यस फिल्मको संगीत अनमोल गुरुङ र तोरेम्पाहाङ राईले दिएका छन् । फिल्मको छायांकन सौरभ लामाले गरेका हुन् भने यसको वितरण आरआर फिल्मले गर्दैछ । आउँदो कार्तिक ७ गते प्रदर्शन मिति तोकिएको यो फिल्मले दर्शकको मन जित्न सक्छ वा सक्दैन, त्यो हेर्न बाँकी नै छ ।