भाइटीकामा रिलिज हुने ‘सोल्टिनी’को टिजर सार्वजनीक, प्रकाश र परीक्षाको प्रेममा उतारचढाव

इटहरी/ भाइटिकाको दिन दर्शकसमक्ष आउने तयारीमा रहेको नेपाली फिल्म ‘सोल्टिनी’ को टिजर सार्वजनिक गरिएको छ । टिजरले प्रकाश सपुत र परीक्षा लिम्बुबीचको प्रेम, ग्रामीण जीवनशैली, समाजको कठोर यथार्थ र बोल्ड निर्णयलाई भावनात्मक ढङ्गले प्रस्तुत गरेको छ । यसअघि सार्वजनिक भएका चार पोस्टरमार्फतै प्रेम, संस्कृति र ग्रामीण परिवेशमा आधारित कथावस्तुको सङ्केत दिइएको थियो भने नयाँ टिजरले सोही पक्षलाई अझ स्पष्ट पारेको छ ।

निर्देशक अर्जुन सुवेदीको निर्देशनमा बनेको फिल्ममा प्रकाश र परीक्षासँगै विल्सन विक्रम राई, सब्बु गुरुङ, रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल, सुजन खतिवडालगायतको अभिनय देख्न पाइनेछ । फिल्मको विशेष आकर्षण कार्यकारी निर्माताको रूपमा ‘हर्क साम्पाङ रिभोलुसन एन्ड द टिम’ को संलग्नता रहेको छ, जसको नेतृत्व धरानका मेयर हर्क साम्पाङले गरिरहेका छन् । हेर्नुस् टिजर ।

इलाम बजार, बिब्ल्याँटे, कन्याम, बिर्तामोड, पथरी र भोजपुरका रमणीय स्थानमा छायाङ्कन गरिएको ‘सोल्टिनी’ समाजमा व्याप्त अमानवीयता र जातीय विभेदविरुद्ध सशक्त सन्देश दिने उद्देश्यले निर्माण गरिएको दाबी गरिएको छ । यो फिल्मको कथा–पटकथा अर्जुन सुवेदी र कुमार भट्टराईले लेखेका हुन् भने संगीत प्रशान्त सिवाकोटी र हर्कुलस बस्नेतले दिएका छन् । छायाङ्कन सुशन प्रजापतिले गरेका हुन् ।

रेजिना बिस्ट र संसार चौलागाईँ निर्माता रहेका यस फिल्ममा रोशन चौलागाईँ, वसन्त कटुवाल र सुजन अधिकारी सह–निर्मातामा छन् । पोस्टर तथा पब्लिसिटी डिजाइन रोयल भीमसेन र ट्राइडेन्ट कन्सेप्टले तयार पारेका हुन् । ‘सोल्टिनी’ लाई नेपालभर टी फल्क्स फिल्म्सले वितरण गर्नेछ भने डिजिटल अधिकार ओएसआर डिजिटलले लिएको छ ।