भोलि सोमबारदेखि देशभरका फिल्म हल खुल्ने, कोशेढुंगाको प्रदर्शन निरन्तर

इटहरी/ देशव्यापी जेन-जी आन्दोलनका कारण केही दिन देखि रोकिएको फिल्म प्रदर्शन अब फेरि सुरु हुँदैछ । सोमबारदेखि फिल्म हलहरू सञ्चालनमा आउने भएपछि भदौ १२ गतेबाट प्रदर्शनमा आएको तर बीचमै रोकिएको फिल्म ‘कोशेढुङ्गा’ पनि निरन्तरता पाउने भएको छ । निर्माण कम्पनी नरदेवी फिल्म्सले आइतबार एक विज्ञप्ति जारी गर्दै सोमबारदेखि फिल्मको प्रदर्शन फेरि सुरु हुने जानकारी दिएको हो ।

विज्ञप्तिमा आन्दोलनका क्रममा ज्यान गुमाएकाप्रति श्रद्धाञ्जली अर्पण गर्दै घाइतेहरूको शीघ्र स्वास्थ्यलाभको कामना गरिएको छ । साथै, सामान्य जीवनतर्फ फर्किनु अहिलेको आवश्यकतामध्ये एक भएको उल्लेख गर्दै ‘कोशेढुङ्गा’लाई निरन्तर प्रदर्शनमा राख्न लागिएको स्पष्ट गरिएको छ । कोशी प्रदेशका केही हलहरुले भोलि सोमबारको लागि शो विभाजन गरिसकेको छ । कोशेढुंगासँगै अन्य २ नेपाली फिल्म माग्ने राजा र गुन्यो चोलो लाई पनि शो दिइएको छ ।

सरोज पौडेलको लेखन तथा निर्देशनमा बनेको कोसेढुङ्गा फिल्ममा सुरक्षा पन्त, आर्यन सिग्देल, ऋचा शर्मा, नीति शाह, प्रवीण खतिवडा, सरोज खनाललगायतका कलाकारको अभिनय छ । नरदेवी फिल्म्स र सारंगी फिल्म्सको सहकार्यमा बनेको फिल्मका निर्माता प्रेवील कँडेल र किशोर अनुराग हुन् । फिल्मको छायांकन बाबु श्रेष्ठ र सम्पादन नहकुल खड्का ले गरेका छन् भने संगीतमा आशिष अविरल र रिदम कँडेल रहेका छन् ।

@parikalanewsofficial